Link açıqlığı

Saatnıñ esas haberi

«Avtozaklar keldi ve insanlarnı mindirip başladılar». Moskvada qırımtatarlarğa qoltutuv içün tutuluv


Rusiye politsiyası Rusiye paytahtı Moskvada Rusiye Yuqarı mahkemesiniñ binası ögüne Bağçasaraydaki birinci «Hizb ut-Tahrir davasınıñ» mabüslerine qoltutmağa kelgen 50-den ziyade insannı tuttı.

​Bu aqta «Qırım birdemligi» cemaat teşkilâtı ve rusiyeli aq qorçalayıcı Aleksandra Krılenkova bildireler.

Faaller mahkeme binası ögünde «Balalarımız terrorist degil», «Qırımdaki repressiyalarnı toqtatıñız» yazuvlı şiarlarınen tura edi.

Moskvada Rusiye Yuqarı mahkemesiniñ binası ögünde tutulğan qırımtatar faallerine qarşı «açıq tedbirni keçirüv nizamını» (Rusiye Memuriy cinayetler kodeksiniñ 20.2 maddesiniñ 5-inci qısmı) bozğanları içün memuriy protokollar tizile.

«Umumen mahkeme ögünde 45 faal tutuldı, olardan 27-si Meşçanskiy politsiya bölügine, 18-i Tagan bölügine alıp ketirildi. Er birine qarşı memuriy kodeksniñ 20.2 maddesiniñ 5-inci qısmına istinaden – toplaşuv, miting, numayış ya da narazılıq aktsiyasını keçirüv nizamını bozuv – protokollar tizile», – dep ayttı rusiyeli aq qorçalayıcı Aleksandra Krılenkova Qırım.Aqiqat mühbirine.

Tutulğan faallerden biri Seydamet Mustafayev politsiya bölüginde bulunıp, mahkeme ögünde insanlar «kimsege keder etmeyip, tınç tura edi», dep bildirdi Qırım.Aqiqatqa.

Tutqanda bizge qarşı küç qullanılmadı, amma insanca olmadı – 27 insan avtozakqa mindirildi»
Seydamet Mustafayev

«Uquq qoruyıcı organlar mahkeme ögüne kelip, qanunsız toplaşuv aqqında tenbilemege başladı, amma insanlar tınç tura edi, mahkeme yanında keçiş açıq edi, kimsege keder etkenleri yoq. Soñra «yaqalamaq» emri kelgendir, eki ya da üç avtozak keldi ve insanlarnı «sarıp bağlamağa» başladılar. Politsiya hadimlerinden iç birisi özüni tanıtmadı ve aqlarımıznı añlatmadı. Politsiya bölüginde çoqmız dep, bizni cedvelde qayd etmediler. Tutqanda bizge qarşı küç qullanılmadı, amma insanca olmadı – 27 insan avtozakqa mindirildi», – dep tarif etti faal.

Cumaaqşamı künü onlarnen insan Rusiye Yuqarı mahkemesiniñ binası ögünde toplaştı. Bu aqta rusiyeli aq qorçalayıcı Aleksandra Krılenkova Facebookta bildirdi.

Onıñ qayd etkenine köre, faaller kurtkalarını çıqarıp, «Qırımdaki repressiyalarnı toqtatıñız» yazısı ile kölmeklerde qalğan soñ Rusiye politsiyasınıñ hadimleri cemaat nizamına riayet etmege çağırıp, «qanunsız aktsiyalar yasaqlana», dep tenbilediler.

Qırım.Aqiqat Moskvadaki vaziyetni közetmege devam ete.

Cumaaqşamı künü, iyülniñ 11-nde, mahkeme dört qırımtatarı – Zevri Abseitov, Remzi Memetov, Rustem Abiltarov ve Enver Mamutovnıñ – ükmüne qarşı berilgen temyiz arizalarını baqmaqta.

2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.

2018 senesi dekabr ayında Şimaliy-Kavkaz okrugınıñ arbiy mahkemesi Enver Mamutovnı 17 yıl sert rejimli koloniyada qalmasına üküm etti, Ruslan Abiltarov, Remzi Memetov ve Zevri Abseitov 9 yıl sert rejimli koloniyada qalmasına üküm etildi.

Mabüslerden iç birisi qabaatını tanımadı. Olar cinaiy işniñ «siyasiy sebepleri bar», dep qayd etti.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

XS
SM
MD
LG