«İnterfaks» Avstraliya TİN atfı etip, Avstraliya akimiyeti Keriç köprüniñ quruluvına alâqası olğan bir hususiy şahıs ve dört Rusiye şirketine qarşı sanktsiyalar qoyulması aqqında qarar aldı, dep haber ete.
«Avstraliya, Rusiyeniñ ve QMC ve Aqyar şeeriniñ (Ukraina) qanunsız işğal etilgen topraqları ile bağlağan Keriç boğazı üzerinde demiryol köprüniñ quruluvı ve areketke ketirilüvi ile alâqalı rus hususiy şaqısqa ve dört Rusiye şirketine qarşı maqsatlı maliye sanktsiyalar qoydı ve yolculıqlarnı yasaq etti», – dep yazıla Avstrailiya TİN beyanatında.
Qayd etilgenine köre, sanktsiyalar «Kanada ile beraberlikte ilân etilgen ve Birleşken Qırallıq ve Avropa Birligi tarafından körülgen areketler ile kelişken».
Bundan ğayrı, Avstraliya TİN-nde qayd ettiler ki, «memleket Ukraina topraq bütünligini ve suverenitetini desteklemege devam ete».
2014 senesinden Avstraliyanıñ sanktsiyalar cedveline Rusiyeden 168 hususiy şahıs ve 52 uquqiy şahıs oğradı.
Martnıñ 29-nda Kanada Qırımnıñ Rusiye tarafından işğal etilmesi sebebinden qoyulğan sanktsiyalar cedveline daa eki husisiy ve dört uquqiy şahısnı qoştı.
AB elçileri Keriç köprüniñ qurucılığı içün eki şahıs ve dört şirketke qarşı sanktsiyalarnı tasdıqladı.
Ukraina Tış işler naziriniñ birinci muavini Emine Ceppar AB daimiy vekiller komitetine Ukraina topraq bütünligini ve suverenitetini bozuv, hususan Keriç köprü qurucılığı ile bağlı şahıs ve teşkilâtlar cedvelini kenişletmek qararını qabul etkeni içün teşekkürler bildirdi.
Daa evel berilgen malümatqa köre, Qıbrız Keriç köprü qurucılığı sebebinden kirsetilgen Avropa Birligi sanktsiyalarını blok ete. AB, bu köpürni qurğan şirketlerge qarşı sanktsiyalarnı 2018 senesi iyül ayında kirsetti.
İyünniñ 18-nde Ukraina Tış işler naziri Dmıtro Kuleba bildirgenine köre, Avropa Birligi Şurası Qırım işğali sebebinden Rusiyege qarşı sanktsiyalarnı bir yılğa uzattı.
Sanktsiyalar 2014 senesi Rusiyeniñ yarımada işğaline cevap olaraq kirsetildi. O vaqıttan berli bir qaç kere uzatılıp kenişletilgen edi.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
2019 senesi dekabr ayında Rusiye prezidenti Vladimir Putin köpürniñ tren areketini başlattı.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
