Nürnbergde Qırım teşkilâtları birliginiñ tesis qurultayı olıp keçti – bu qurulış qırımtatarlarnı halqara alanda temsil etecek.
Matbuat vesiqasına köre, birlik yedi teşkilâtnı ve Almaniya, Belçika, Poloniya ve Estoniyadan teşebbüs gruppaları ve faallerni birleştirecek. Qurultaynıñ işinde tahminen 40 insan iştirak etti. Berilgen malümatqa köre, yañı teşkilâtnıñ esas vazifeleri arasında – Avropada qırımtatarlarnıñ yerini quvetleştirmek, milliy parlament ve Avropa qurulışlarında halq menfaatlarını köstermek, tasil, medeniyet ve aq qorçalayıcı teşkilâtlarına qoltutmaq içün fond ve Qırım tedqiqat institutını qurmaqtır.
Qırım teşkilâtları birliginiñ quruluvına GfbV (Telüke altında olğan halqlarnı qoruv cemiyeti) ve ICATAT (Kavkazşınaslıq, türkşınaslıq ve türkestanşınaslıq institutı) qoltuttı.
Birlik prezidenti olaraq qırımtatar faali Elvis Çolpuh saylandı. Teşkilâtnıñ timsalı altın lâleli qırmızı bayraq oldı – qırımtatar medeniyetiniñ bu örnegi itibar, canlanuv ve nesiller bağını timsal ete.
Birlik özüni diasporanı birleştirgen ve «halqnıñ azatlığı ve ibibarı oğrunda küreşte yañı saife» açqan yañı qurulış olaraq köstere.
Qırımtatar Milliy Meclisiniñ reisi Refat Çubarov Qırım.Aqiqatqa qayd etkenine köre, şimdi, insanlar işğal etilgen yarımadanı terk etip, farqlı memleketlerde yerleşmege mecbur olğanda, qırımtatarlar arasında koordinatsiya pek müim ola.
«Çetelde teşkilâtnı qurmaq niyetleri aqqında haberimiz olğanda quvandıq. Aynı vaqıtta faaliyeti soñki 34 yıl devamında qırımtatar milliy idare sistemasına zıt kelmesin dep, bazı izalar yaptıq», – dep qayd etti o.
Çubarovnıñ hatırlatqanına köre, bu sistemada Qurultay, Meclis ve Dünya qırımtatar kongressi bar. Onıñ qayd etkenine köre, bütün cemaat teşkilâtları 2015 senesi Dünya qırımtatar kongressiniñ nizamnamesinde pekitilgen bütün esaslarğa riayet etmeli. Anda cemaat teşkilâtları köstergen faaliyetlerinde Qurultay ve saylağan Meclisini qırımtatar halqınıñ yüksek temsiliy organları olaraq tanıy, dep aytıla.
Çubarovnıñ aytqanına köre, Qırım teşkilâtları birliginiñ teşkilâtçıları Meclisniñ izalarına qulaq astı, amma qararlarınıñ tafsilâtları vesiqalarnen tanış olğan soñ belli olacaq. O, faaliyetleri bir-birine zıt kelmese, teşebbüslerniñ raqipligi ola bile, dep qoştı.
«Cemaat-siyasiy faaliyetnen oğraşqan er kes daa 34 yıl evelsi 1991 senesi iyün ayında Ekinci Qırımtatar Milliy Qurultayınıñ keçirilüvinen qurulğan qırımtatar milliy areketinde bir idare sisteması bar olğanına esaslanmalı», – dedi Çubarov.
Qırımtatar jurnalisti Osman Paşayev Cemaat içün yazğanlarında teşebbüsnen bağlı bazı şübheli fikirler bar, dep qayd ete – liderlerniñ bir qısmı ve diaspora faalleri Birlik şimdiki qurulışlarğa raqip olıp, tesir ve resurs (grantlarnı) ala bile.
