Ğarbiy ve Merkeziy Avropada bir qaç künden berli pek sıcaq. Bir sıra memlekette eñ yüksek ava arareti köstergiçleri yükseldi. Frenkistanda cuma künü sıcaq rekord köstergiçi deyerli 2 derecege aştı. Frenkistannıñ yañı araret rekordı - Tselsiyge köre 45,9 derece. Böyle ava arareti memleketniñ cenübinde, Monpelyeniñ yanında qayd etildi, dep bildire Azatlıq Radiosı.
Poloniya ve Çehiyada çarşenbe künü ava arareti 38 derecede edi. Bazar künü Almaniya, Poloniya ve Çehiyada da öyle sıcaq kün olacağı beklenile.
Eñ sıcaq ava - Frenkistan cenübinde ve İspaniyada. Anda bir qaç künden berli ava arareti 40 dereceden yuqarı köterile. İspaniyanıñ şimal-şarqında ve merkeziy qısmında vaziyet tabiat yanğınları içün daa müşküldir.
Şimdiki yüksek ava araretiniñ sebepleri - Afrika Sahrasından sıcaq avadır. Endigi afta Avropada salqınca olmaq kerek. Amma iklimciler, bu iyül çoq memlekette, keçken yıllarğa köre, eñ sıcaq olmaq mümkün, dep qayd eteler, bu - iklimniñ büyük deñişmeleriniñ daa bir tasdıqıdır. İklim deñişmesinen daa faal küreşmege çağırtqan Frenkistan prezidenti Emmanuel Makron, şimdiki sıcaq kibi adiseler, ayatiy alışqanlıqlarnıñ deñiştirmesi ve yañı aqiqatqa alışması aqqında tüşündire.
