“Evrovision” teşkilcileri - Avropa Yayın Birligi, Ukrainanıñ “Evrovision”da iştiraginden redini tefsir etti. Bu aqta Azatlıq Radiosı bildirmekte.
“Ne yazıq ki, UA:Perşıy ukrain TV ve Radio şirketi, munaqaşalardan soñ “Evrovision-2019” yarışından ayırılmağa qıyın qarar alğanlarını bildirdi. Birlik ve UA:Perşıy arasında muzakere devam etecek, amma olarnı 2020 senesi kene körmege ümüt etemiz”, - denile beyanatta.
Fevralniñ 23-nde «Eurovision-2019» ukrain milliy saylavında yırcı Maruv ğalebe qazandı. Maruv Rusiyede çıqışta bulunğanını aytqan edi. Daa soñra MARUV «Eurovisionğa» barmaycağı aqqında belli oldı. O, Ukraina milliy devlet teleradiokompaniyası ile añlaşıp olamadı.
Yırcı MARUV «Eurovisionda» iştirak etmekten vazgeçkenini izaatlap, «yarıştaki iştirakini siyasetçilerimizniñ aktsiyalarına çevirmeyip», şiarlarnen çıqışta bulunmağa azır olmağanını bildirdi. Bundan evel yırcı onı yır yarışından vazgeçtirmek içün basqı yapalar, dep ayttı.
Daa soñra Freedom-jazz, Kazka ve Brunettes Shoot Blondes taqımları yarışta iştirak etmekten vazgeçti.
