Birleşken Milletler Teşkilâtı Telükesizlik Şurasınıñ oturışında Avropa Şurasınıñ reisi Charles Michel Rusiyeni arbiy cinayetlerde, aşayt şantajında, global aşayt buhranına sebep olmaqta ve zahire teslimatını silâ kibi qullanılmasında qabaatladı.
Charles Michel, Rusiye Ukrayina zahire anbarlarını bombalağanını, Ukrayinanıñ topraqlarınıñ ekseriyetinde ekmege bermegenini, zapt etilgen topraqlarda zahireni qırsızlağanını ve aşayt buhranını silâ kibi qullanmağa tırışqanını bildirdi. Aynı zamanda, AB temsilcisi hatırdattı ki, Rusiyeniñ sözlerine baqmadan, AB Rusiyeniñ agrar sektorına qarşı sanktsiyalar qomağanını ve mevcut sıñırlavlar onıñ zahire ve kübreleriniñ üçünci memleketlerge ihracına mania olmay.
Buña cevap olaraq Rusiyeniñ MBT-daki daimiy temsilcisi Vasiliy Nebenzâ avropalı siyasetçini "yalan tarqatqanında" qabaatlap, oturış zalını terk etti.
Michel Rusiye diplomatınıñ areket tarzına böyle dedi: "Siz kete bilesiñiz, bu aqiqatnı diklemekten daa qolaydır, ürmetli elçi".
Mayısnıñ 21-ne olğan malümatqa köre, Ukrayina prezidenti Volodımır Zelenskıynıñ sözlerine köre, Rusiye Ukrayina limanlarında "yavaş-yavaş qursızlağan ve çıqarıp, satmağa tırışqan" 22 million tonna aşayt blok etken.
Dünya toplulığı Rusiyeni limanlarını açmağa ve ukrayin zahiresiniñ ihrac etilmesine yol bermege çağıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
