Avropa Şurasınıñ İnsan aqları komissarı Dunâ Miyatoviç Rusiye tarafından işğal etilgen Qırımda qırımtatarlarnıñ aqlarınıñ çoq sayılı bozuvları aqqında bildirdi. Bunıñ aqqında Şuranıñ saytında yazıla.
"Qırımdaki qırımtatarlar ve hususan Qırımnıñ qanunsız işğaline qarşı çıqqanlar ya da diger mevzularda narazılıqlar bildirgenler Rusiye işğal akimiyet organları tarafından çoq sayılı ciddiy insan aqları bozuvlarına, taqiplerge, diskriminatsiya ve stigmatizatsiyağa oğratıla", - dep bildirdi o.
Komissar qırımtatarlarğa qarşı zulumlarnı, faallerniñ, uquq qoruyıcılarnıñ ve jurnalistlerniñ esassız tevqif etilüvini, taqip etilüvini toqtatmağa çağırdı.
Miyatoviç, Rusiye Federatsiyası topraqlarında apis yerlerinde olğan qırımlılarğa insaniyetli munasebet olması çağıruvında bulındı.
"Halqara insan aqlarınıñ monitoring mehanizmleri ve gumanitar teşkilâtlar bütün mabüslerge, şu cümleden qırımtatarlağa telükesiz ve maniasız irişimge malik olmalıdır", - dep qayd etti o.
Miyatoviçniñ sözlerine köre, qırımtatarlar toplaşa ve öz fikrirlerini ifade etme, din kütme, qırımtatar tilinde tasil alma ve medeniyet mirasınıñ qoruma aqqına saip olmalıdır.
Ayrıca, Qırımda qırımtatarlarnıñ mecburiy arbiy hızmetke çağırılmasını ve arbiy seferberlikni toqtatmağa çağırdı.
Daa evel Qırımtatar resurs merkezinde bu yılnıñ ilk üç ayında Rusiye tarafından işğal etilgen Qırımda quvetçiler 49 kere qırımtatarlarnı yaqaladılar, dep haber etken ediler.
Qırımtatar resurs merkezi bu yılnıñ ilk üç ayı içinde Rusiye uquq qoruyıcıları işğal etilgen Qırımda 49 qırımtatarını tuttı, dep bildirgen edi.
2022 senesi dekabr ayında yañartılğan BM Baş assambleyasınıñ Rusiye ilhaq etken Qırımda ve Aqyarda insan aqları vaziyeti qararında «Qırımda sebepsiz tutuvlar, Qırımğa ve Qırımdan zornen avuştıruv», hırsızlav, «filtratsiya tedbirleri» takbih etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
