Avropa parlamenti oktâbrniñ 9-nda keçirilecek toplaşuvda Ukrainadaki vaziyetnen bağlı munaqaşa keçirecek. Bu aqta Avropa parlamentiniñ saytında aydınlatılğan cedvelde aytıla, dep bildire Azatlıq Radiosı.
Munaqaşa Brüsseldeki toplaşuvda üyleden soñ olacaq.
İyül ayında Avropa parlamenti qarar çıqarıp, Rusiyeni ukrainalı siyasiy mabüslerni azat etmesine çağırğan edi.
Bundan ğayrı, Avropa parlamenti, Rusiye tarafından «halqara uquqnıñ esas printsipleri ve normalarınıñ bozulğanını, hususan halqara mahkemelerniñ qararlarını yerine ketirilmegenini takbih etti; Rusiyeni Avropa insan aqları mahkemesiniñ Qırım yarımadasında ve Rusiyede tutulğan şahıslarnıñ aqlarını bozuv qararlarını yerine ketirmesine çağırdı».
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
