Aktsiyanıñ teşebbüsçisi çeşit siyasiy gruppalardan beş Avropa deputatı – Marketa Gregorova (Zelenıye/EFA, Çeh Cumhuriyeti), Pâtras Auştreviçus (Obnovlennaya Yevropa, Litvaniya), Andrey Kovaçev (YENP, Bulğaristan), Reynis Poznâk (YEKR, Latviya) ve Tiys Royten (S&D, Felemenk).
Ukrayinalı siyasiy mabüslerge mektüp yazuv fevralniñ 10-13-nde Strasburgda Avropa parlamentiniñ umumiy sessiyası vaqtında oldı.
Teşebbüs Ukrayina ortaqları sayesinde oldı – ZMINA ve «Qırım esnası» aq qorçalayıcı teşkilâtları Kremlniñ qırımlı reineleri bulunğan yerler aqqında malümat berdi.
«Serbest Qırımğa mektüpler» aktsiyası 2023 senesi apel ayında başladı. Onıñ maqsadı – Kremlniñ ukrayınalı reineleri aqqında hatırlatıp, olarğa qoltutqanını köstermek. Bundan ğayrı, mektüpler Rusiye apishaneleriniñ memuriyetleri içün bir işaret ola, er bir Ukrayina vatandaşı müim, cemiyet ise tutuv şaraitlerini közete, dep köstere.
«Qırım platforması» faaliyetini temin etüv hızmeti reisiniñ muavini Anna Sitnikova haber etkenine köre, 2024 senesi teşebbüs Rusiyede qanunsız tutulğan mabüsler içün 1800 mektüp toplağan. ZMINA insan aqları merkeziniñ leyhalar meneceri Viktoriya Nesterenko qoştı ki, 2024 senesi 25 cemaat tedbiri keçirildi, anda insanlar mektüp yaza bile ediler. Kitap forumları, matbuat turları, farqlı şeerlerde körüşüvler oldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
