Yañı saylanğan Avropa parlamenti cumaaqşamı künü, iyülniñ 18-nde, Rusiye akimiyetiniñ areketleri takbih etilgen Kremlniñ ukrainalı siyasiy mabüslerinen bağlı Rusiye rezolütsiyasına qoltuttı.
Qararğa 458 deputat qoltuttı, 80-i qarşı çıqtı, 89-ı bitaraf qaldı.
Vesiqa metni Ukrainanıñ Avropa Birligi temsilciliginiñ saytında derc etildi.
Avropa parlamenti ilk evelâ Rusiye akimiyetini Rusiyede ve vaqtınca işğal altındaki Ukraina topraqlarında tutulğan bütün Ukraina vatandaşlarını azat etmesine ve olarnıñ, şu cümleden 2018 senesi noyabr ayında zapt etilgen ukrainalı deñizcilerniñ, telükesiz qaytuvını temin etmesine çağırdı.
«Rusiye akimiyetini vaqıt sozmayıp ve qoşma şartlar qoymayıp, Rusiyede ve vaqtınca işğal etilgen Ukraina topraqlarında qanunsız tutulğan bütün Ukraina vatandaşlarını azat etmege ve olarnıñ, şu cümleden 2019 senesi iyülniñ 10-nda Qızıl meydandaki narazılıq aktsiyası sebebinden tutulğan qırımtatarlar, siyasiy sebeplerden tutulğan Ukraina vatandaşları ve 24 ukrainalı deñizciniñ telükesiz qaytmasını temin etmege çağıra», – dep aytıla qararda.
Rezolütsiyada Rusiyeni «Donbasta ve Luganskta işğal etilgen Ukraina topraqlarında tutulğan mabüslerniñ tolu cedvelini derc etmege ve olarnıñ qoranta ve advokatlarınen bağlanmasına yardım etmege» çağırdılar.
Rezolütsiyada Rusiyede casuslıqta qabaatlanıp tutulğan ukrainalılarğa büyük diqqat ayrıldı.
«Avropa parlamenti qasevetlenip bildire ki, Rusiye mahkemeleriniñ ukrainalı siyasiy mabüslerge qarşı çıqarğan bir çoq qararı casuslıqnen bağlı (Pavlo Ğrıb, Aleksey Stogniy, Gleb Şabliy, Vladimir Prisiç, Vladimir Dudka, Dmitriy Ştıblikov, Yevgeniy Panov, Andrey Zahtey, Valentin Vıgivskiy, Viktor Şçur ve Dmitriy Dolgopolovnıñ davaları), bu ise keçken asırnıñ 30-ıncı yıllarından 50-nci yıllarınıñ ortalarına qadar repressiv devir aqqında hatırlata, o vaqıt Sovetler Birliginiñ bir çoq vatandaşı aynı sebepten tutulğan ve mahküm etilgen edi», – dep aytıla vesiqa metninde.
Parlament azaları insan aqları bozulğanı içün Avropanıñ sanktsiyalar rejimine qoltutqanını tasdıqladı.
Ukraina Tış işler nazirliginiñ malümatına köre, Rusiye 70-ten ziyade ukrainalını qanunsız alda tuta. Olarnıñ arasına 2018 senesi noyabr ayında Qara deñiz yalısı yaqınlarında Rusiye tarafından zapt etilgen 24 ukrainalı deñizci ve Donbastaki esirler kirmemekte.
İyülniñ 17-nde Ukraina prezidenti Volodımır Zelenskıy telefonda laf etken Rusiye prezidenti Vladimir Putin «bütün» esirlerni deñişmege teklif etti, dep bildirdi.
