Avropa parlamenti Qırım ve Aqyarnıñ Rusiye tarafından qanunsız ilhaq etilmesiniñ 11 yılı ve Qırımda insan aqları vaziyetiniñ fenalaşmasına ait qararnı qabul etti.
Vesiqağa 446 deputat qoltuttı, 25 deputat qarşı rey berdi, 51-i reyden vazgeçti.
Onda AP deputatları vatandaş jurnalist ve aq qorçalayıcı İrına Danılovıçnı, vatandaş jurnalistler ve qırımtatar faalleri Tofik Abdulgaziyev, Amet Suleymanov ve diger qırımlı siyasiy mabüslerni tez vaqıtta azat etmege çağırdılar.
Vesiqada deputatlar Qırımdaki Rusiye küçleri vatandaşlarnı, hususan, qırımtatar cemiyetiniñ siyasiy faal azalarını, jurnalistlerni, dissidentlerni tutqanlarını, em de qırımtatarlarnı terrorizmde uydurılğan qabaatlavlarnen taqip etkenlerini bildirdiler.
«Rusiye apishanelerinde 200-den ziyade qırımlı siyasiy mabüs buluna, şu cümleden 133 qırımtatar ve 67 siyasiy mabüsniñ ciddiy sağlıq problemleri bar ve olar baquvğa muhtac», – dep qayd etile qararda.
Qararda Emil Kurbedinov, Server Mustafayev, Emir-Usein Kuku, Lutfiye Zudiyeva, Kulamet İbraimov, Abdureşit Cepparov, Edem Semedlâyev, Rustem Kâmilev, Aleksandr Sizikov, Galina Dovgopola, Ruslan Abdurahmanov, Rustem Gugurik ve Lilâ Gemeci kibi qırımlı advokat, aq qorçalayıcı ve faallerniñ taqip etilgeni aytıla.
Avropa parlamenti bütün qırımlı siyasiy mabüslerni tez vaqıtta azat etmege, olarğa tibbiy yardım köstermege ve olarğa qorantalarınen, advokatlarnen ve halqara qurulışlarnen, şu cümleden Qızıl Haçnıñ Halqara komiteti ve BMniñ zornen ya da göñülsiz ğayıplar işçi gruppasınen qonuşmağa imkân bermege çağırdı.
«Qırımnıñ kelecegi qırımtatarlarnıñ yarımadağa öz tarihiy vatanı olaraq ayırılmaz aqqınıñ tanılması ve qorçalanmasınen bağlı olmaq kerek», – dep qayd etile metinde.
Qararda aynı vaqıtta Ukrayinağa qarşı istilâ cinayeti boyunca mahsus tribunalnı yaratmaq kerekligi hatırlatıla, o, 2014 senesinden başlap Rusiyeniñ Ukrayinağa ücümini qaplamalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
