Avropa Parlamentiniñ mebusları "Rusiyeniñ Ukrayinağa qarşı tecavuziy cenkinden soñ" Avropa Birliginiñ tış siyaseti ve telükesizlik ve mudafaa siyaseti ile bağlı qarar qabul etti. Vesiqa Avropa Komissiyasını ve AB Şurasını Avropa Birligine qoşulmaq içün Ukrayinağa namzet statusını bermege çağıra.
Qararğa 438 mebus qoltuttı, 65 qarşı çıqtı, 94 bitaraf qaldı, dep haber ete Deutsche Welle.
"Ukrayina halqı ile birdemlikniñ açıq-aydın siyasiy alâmeti kibi Ukrayinağa namzet statusını bermek", - dep yazıla vesiqada.
Bundan ğayrı mebuslar Avropa memleketleriniñ başlıqlarını "Ukrayinağa kerek olğan silâlarnı deral bermege", "arbiy areketler bitken soñ memleketniñ ğayrıdan tiklenilüvine azamiy isse qoşmağa azır olmağa" ve "Ukrayinanıñ ğayrıdan tiklenilmesi ve oña tazminat ödenilmesi içün Rusiyeniñ buzlatılghan aktivleriniñ musadere etilme maqsadınen uquqiy mehanizm yaratmağa" çağırdılar.
Avropa Parlamentiniñ mebusları "Rusiyeniñ Ukrayinada etken arbiy cinayetleriniñ araştırmasını" desteklemege tevsiye etti.
Fevralniñ 28-nde Ukrayina prezidenti Volodımır Zelenskıy AB azalıq arizasını imzaladı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
