Avropa komissiyasınıñ yañı prezidenti Ursula Gertrud von der Leyen Ukraina prezidenti Volodımır Zelenskıyge sanktsiyalar qalacaq, dep vade etti, dep bildire Ukraina prezidentiniñ ofisi. Bu aqta Azatlıq Radiosı haber ete.
«Avropa Birliginiñ sanktsiyaları Minsk añlaşmalarınıñ bütünley yerine ketirilmesinen bağlı qalıp, Avropa şurasınıñ kelecek toplaşuvında uzatılmalı», – dep qayd etti Ursula von der Leyen telefon subeti vaqtında.
O, Avropa Birligi Ukrainanıñ suvereniteti ve topraq bütünligine qoltutmağa devam etip, ileride Kyivge islâatlar esnasında yardım etecek, dep işandırdı.
Zelenskıy, Ursula von der Leyenniñ işi vaqtında «Avropa Birliginiñ Ukraina topraq bütünligi ve suverenitetini qoruv ve islâatlar destegindeki rolü tek quvetleşecek», dep ümüt etkenini bildirdi.
Avropa komissiyası telefon subeti aqqında daa haber etmedi.
Dekabrniñ 1-nde Ursula Gertrud von der Leyen reisliginde Avropa komissiyasınıñ yañı erkânı işke başladı. Von der Leyen Avropa komissiyasınıñ ilk qadın reisi oldı.
