Avropa komissiyasınıñ prezidenti Ursula Gertrud von der Leyen Kyivge kelip çıqtı.
«Cenk vaqtında altıncı ziyaretim vaqtında Kyivge qaytmaqtan memnünim. Ukrayınanıñ Avropa Birligine qoşuluv yolunı muzakere etmek içün keldim. Zemaneviy inkişaf etken demokratiya olaraq Ukrayınanıñ ğayrıdan tiklenüvi içün Avropa Birligine maliye qoltutuvnı muzakere etecekmiz. Ve Rusiyeni zapt etici cenki içün ödemege nasıl mecbur etecegimizni», – dep yazdı o, X içtimaiy ağında.
Bundan evel «Ğolos» fraktsiyasınıñ azası Yaroslav Jeleznâk bildirgenine köre, Avropa komissiyasınıñ prezidenti Ukrayına Yuqarı Radasında çıqışta bulunacaq.
Avropa komissiyası noyabrniñ 8-nde Ukrayına Avropa Birligi azalığı talaplarında irişken muvafaqiyetlerge qıymet kesecek. Bu qoşuluv muzakereleriniñ başlanğıçı aqqında qararda esas adım ola.
2022 senesi iyün ayında Avropa şurası Ukrayınağa Avropa Birligine qoşuluv namzeti statusını berüv qararını aldı. Avropa Birliginiñ liderleri Moldovanen bağlı da aynı qarar aldı.
Bu yıl iyünniñ 22-nde Avropa komissiyası Ukrayına muzakere başlatmaq içün kriteriylerni yerine ketirgenine qıymet kesti: yedi kriteriyden ekisi bütünley yerine ketirildi, qalğanları ileriley.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
