Avropa komissiyası iyünniñ 7-nde Ukrayınanıñ Avropa Birligine kirüv muzakereleriniñ başlanmasına qoltuttı. Bu aqta baş nazir Denıs Şmığal bildirdi.
«Avropa integratsiyası esnasımızğa kesilgen pozitiv qıymetimiz içün minnetdarmız. Avropa komissiyasınıñ seslendirilgen qararında Ukrayına Avropa Birligine qoşulmaq içün muntazam sürette ğayret köstere ve dört islâat adımınıñ episini yerine ketirdi», – dep bildirdi ükümet yolbaşçısı.
Şmığal, Kyiv Avropa ortaqlarından nevbetteki adımnı bekley – Avropa Birliginde azalıq muzakereleri bu ay başlana. «Ukrayına halqı Rusiye istilâcısına qarşı cenkte avropalı qoranta içinde olmaq aqqı oğrunda küreşe», – dep qoştı o.
Matbuat vastaları, hususan Euractiv neşiri, informatsion subetdeşleriniñ malümatına esaslanıp, Avropa komissiyası Ukrayına ve Moldova Avropa Birligine kirüv muzakereleriniñ başlanmasına «bayağı azır», dep bildirdi. Komissiya AB elçilerine Ukrayına dört, Moldova ise muzakereler içün kerek olğan üç adımnı yerine ketirdi, dep tasdıqladı.
Mayısta Ukrayına prezidenti Volodımır Zelenskıy bildirgenine köre, Kyiv muzakere çerçivesiniñ tasdıqlanmasını «faal sürette iyünge azırlay» ve Ukrayınanıñ qoşuluv muzakereleriñ başlanmasını bekley.
Fevral ayında Avropa komissiyasınıñ prezidenti Ursula Gertrud von der Leyen Ukrayınanıñ Avropa Birligine qoşuluv muzakere çerçivesi 2024 senesi iyün ayında ötkerilecek Avropa Birligi saylavları başlanmazdan evel «azır olmaycaqtır», dep tahmin etti.
Avropa şurası dekabrniñ 14-nde Ukrayına ve Moldovanıñ Avropa Birligine kirüv muzakerelerini başlatmağa, Gürcistanğa ise AB aza namzeti statusını bermege qarar aldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
