Avropa komissiyasınıñ prezidenti Ursula Gertrud von der Leyen Rusiye prezidenti Vladimir Putinge işanmağa olmay, şunıñ içün Avropa arbiy imkânlarını quvetleştirmeli, dep ayttı.
«Putin özüniñ duşman qomşu olğanını kene ve kene isbatlay. Oña işanmaq mümkün degil, onı tek tutmaq mümkün. Ve biz Rusiyeniñ arbiy kompleksi bizimkinden üstün olğanını bilemiz. Arbiy masraflarğa kerçek taraftan baqsaq, Kreml bütün Avropadan daa çoq masraf ete. Avropa istisalı daa alçaq tertipte buluna. Ve ananeviy imkânlardan ğayrı, rastkelgen telükelerniñ diapazonı er kün daa keniş ola», – dedi o, Avropa parlamentiniñ munaqaşalarında.
Onıñ aytqanına köre, yıllar devamında Avropa parlamenti Avropa daa büyük olmalı, dep ayta edi – ve bu bir kerçek edi.
«Bu daa havflı devirde Avropa daa faal olmaq kerek. Ve keçken afta liderlerge taqdim etken planımnıñ maqsadı da budır. Onıñ mantığı adiy: biz mudafaa istisalımıznı quvetleştirmek ve tezleştirmek içün elimizdeki bütün maddiy imkânlarnı qullanmaq isteymiz. «Avropanı yañıdan silâlandıruv» planınen biz 800 milliard euroğa qadar para seferber ete bilemiz», – dep qoştı von der Leyen.
ABD memuriyeti Avropa kelecekte mudafaa içün öz küçlerine tayanmaq kerek olacağını ima etken soñ Avropa Birliginiñ liderleri martnıñ 6-nda Brüsseldeki sammitte arbiy masraflarnı keskin şekilde arttırmaq planlarını tasdıqladı.
AB devletleri arbiy masraflarnı arttırmağa imkân bergen bücet sıñırlarınıñ zayıflatmasını tasdıqladı. Avropa komissiyasınıñ esaplarına köre, böyle etip, 650 milliard euro azat etile bile.
Sammit iştirakçileri Avropa komissiyasınıñ AB memleketleri içün mudafaada ilerideki yatırımlar içün 150 milliard euro kredit fondu teklifini qabul etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
