Avropa komissiyasınıñ yolbaşçısı Ursula fon der Lâyen, iyülniñ 6-nda Avropa Birliginiñ 27 memleketi Rusiye gazınıñ teslimatı tamamınen kesilmesine azırlanmaq içün fevqulâde vaziyetler planını azırlamaq kerek dep bildirdi.
Fon der Lâyen, komissiya Rusiye gazınıñ teslimatınıñ tamamınen kesilmesi vaziyetinde "eñ çoq ihtiyac duyulğan yerge gaznıñ aqımını" temin etmek içün iyülniñ ortalarında Umumavropa fevqulâde vaziyet planlarını ilân etmege planlaştırğanını bildirdi.
Avropa Birliginiñ icra akimiyetiniñ yolbaşçısı bildirdi ki, blok Moskvadan kelgen teslimatnıñ kesilmesine azır olmalıdır.
"Biz gaz teslimatınıñ kelecek aqsamalarına ve atta Rusiye gazınıñ teslimatınıñ tamamınen toqtalımasına azır olmalımız. Putin energetikanı silâ kibi qullanmağa devam etkeni körünip tura", - dedi o.
O, Rusiyeniñ artıq 12 AB aza memleketine gaz teslimatını eksiltkenini de bildirdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
