Avropa komissiyası, yañı çeşit koronavirus pandemiyası sebebinden Avropa Birligi memleketlerinde karantinniñ lâğu etilüvi içün üç kriteriy belgiledi. Avropa Birliginde sıñırlavlar lâğu etilecek künü daa belli degil. Bu aqta Avropa komissiyasınıñ yolbaşçısı Ursula Gertrud von der Leyen ayttı, dep haber ete Azatlıq Radiosı.
Müessise saytındaki vesiqağa köre, sıñırlavlarnıñ lâğu etilüvi içün ilk şart COVID-19 tarqaluvınıñ eksilüvi olmalı, hususan hastalarnıñ sayısı eksilmeli.
Avropa komissiyası aydınlatqan ekinci şart yerli sağlıq sistemalarınıñ yeterli küçü ola. Hastalar içün yeterli qadar yer, tibbiy donatma ve kerekli cihazlar olmalı.
Üçünci şart – hastalıq ve hastalanğan sakinlerniñ bağ monitoringi. Mında keniş test yapuv imkânları aqqında aytıla.
Mayısnıñ 4-nde Avropa komissiyası koronavirus ile küreşte yardım toplamaq içün donorlar konferentsiyasını keçirecek – birinciden aşı azırlamaq içün.
Soñki malümatqa köre, Avropa memleketlerinde qayd etilgen COVID-19 hastalarınıñ sayısı milliondan çoq ola. Dünyada hastalanğanlarnıñ yarısıdır. Bazı memleketlerde hasta sayısı eksile, amma qırğınlıq azala kibi beyanatlar daa yoq. Akimiyet sakinler içün ara-sıra tedbirlerni yımşata, amma AB memleketleriniñ ekseriyetinde karantin tedbirleri mayısnıñ ortasına qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
