Advokat Nikolay Polozovnıñ bildirgenine köre, Rusiye Tahqiqat komitetiniñ qırımtatar milliy areketiniñ veteranı Veciye Kaşkanıñ vefatınen bağlı cinaiy dava açmaq istemegenine qarşı şikâyet Avropa insan aqları mahkemesine yollanıldı.
«Veciye Kaşka içün adalet küreşi devam ete. Rusiye yurisdiktsiyası çerçivesinde bütün imkânlarnı qullanıp, Veciye Kaşkanıñ tuvğanları Avropa insan aqları mahkemesine muracaat etti. Şikâyet bir-eki afta evelsi yollanıldı. Mahkeme ulaşuvını bekleymiz. Eminim, bütün qıyınlıqlarğa, Rusiye repressiv sistemasınıñ tirenüvine, bütün bu «özüñkilerni teslim etmemek» ıntıluvlarına baqmadan, bu efsaneviy qadınnıñ ölüminde qabaatlı olğanlar mahküm etilecek ve aqiqat yeñecek», – dep yazdı Polozov Facebookta.
Oña efsane dey ediler. Veciye Kaşkasız üç yıl (fotoresimler)
Yanvarniñ soñunda advokatnıñ bildirgenine köre, Rusiye Tahqiqat komiteti onıñ Veciye Kaşka ölüminen bağlı cinaiy dava açmağa razı olmağanına qarşı şikâyetini red etti.
Daa soñra Rusiye kontrolindeki Aqmescitniñ Kiyev rayon mahkemesi ve Qırım Yuqarı mahkemesi advokatnıñ qırımtatar milliy areketi veteranınıñ vefatınen bağlı teşkerüv keçirmege razı olmağanına qarşı şikâyetlerini red etti.
2017 senesi noyabrniñ 23-nde Aqmescitte Rusiye uquq qoruyıcıları Kâzim Ametov, Asan Çapuh, Ruslan Trubaç ve Bekir Degermencini tutıp aldı.
Olar Türkiye vatandaşı Yusuf Aytandan para talap etüvde şeklene. Rusiye uquq qoruyıcıları faallerni tutqanda qırımtatar milliy areketiniñ veteranı Veciye Kaşka yaramadı. İlk yardım maşinasında qadın can berdi.
Qırımtatar Milliy areketiniñ faali Nariman Celâlnıñ bildirgenine köre, faallerniñ tutulmasına sebep olğan Türkiye vatandaşı Veciye Kaşkanıñ qorantasından para hırsızladı.
2019 senesi aprelniñ 7-nde Rusiye kontrolindeki Aqmescitniñ Kiyev rayon mahkemesi para talap etüvde qabaatlanğan «Veciye Kaşka davasınıñ» mabüslerine üküm çıqardı. Ruslan Trubaç, Bekir Degermenci ve Kazim Ametov 3 yılğa şartlı olaraq üküm etildi, 3 yıl sınav müddeti olaraq belgilendi. Asan Çapuh 3,5 yıl şartlı apis cezasını aldı, 3 yıl sınav müddeti olaraq belgilendi.
Bekir Degermenci, Asan Çapuh, Kazim Ametov ve Ruslan Trubaç qabaatlarını tanımadı.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
