«Ukrainanıñ Rusiyege qarşı (Qırım)» davasınıñ diñlevleri keçirilecek Avropa insan aqları mahkemesiniñ oturışuvı sentâbrniñ 11-ne belgilendi, dep bildirdi adliye naziriniñ muavini, AİAM işleri vekâletlisi İvan Lişçına.
«AİAM meseleleri vekâletlisiniñ kâtibiyeti bu sene fevral ayından berli beklenilgen mektüpni aldı. Mahkeme oturışuvı 20958/14 (Qırım boyunca) 2019 senesi sentâbrniñ 11-ne belgilendi. Bu sefer ötkerilsin dep ümüt eteyik», – dep yazdı Lişçına Facebook saifesinde.
Bundan evel AİAM fevralniñ 27-ne baqılması belgilengen Qırımda insan aqlarınıñ bozulmasına dair Ukrainanıñ Rusiyege qarşı davasını başqa künge qaldırdı.
Avropa insan aqları mahkemesinde Ukrainanıñ Rusiyege qarşı beş davası bar.
2018 senesi avgustnıñ 10-nda Ukraina Avropa insan aqları mahkemesine Kremlniñ ukrainalı siyasiy mabüslerinen bağlı yañı devletlerara şikâyetni bergen edi.
Avropa insan aqları mahkemesinde vatandaşlarnıñ Rusiyeniñ ilhaq etken Qırımda ve Donbastaki vaqialarnen bağlı dört biñ davası mevcut.
Avropa parlamenti Rusiyeni qanunsız tutulğan ve apiske alınğan ukrainalı siyasiy esirlerni acele azat etmesine çağırğan edi.
