Avropa insan aqları mahkemesi işğal etilgen Qırımda vatandaş jurnalisti İrına Danılovıçnıñ qanunsız yaqalanması ile bağlı muracaatnı baqacaq. Bunı iyünniñ 13-nde "QırımSOS" cemaat teşkilâtı Danılovıçnıñ advokatı Sergey Zaytsevge atfı etip bildirdi.
"Protokol tizilmeden ya da bu faktnı qaydğa almadan yaqalav, yerli FSB idaresiniñ mağazında advokat ile körüştirmeden tış dünya ile alâqasız tutuv, ikencelerge oğratuv - bütün bular esas insan aqlarınıñ bozulmasıdır. Aynı zamanda Rusiye quvetçileri İrına olarda öz isteginen bulunğanını iddia eterek, bozuv faktını red etmege tırıştı", - dep "QırımSOS" Danılovıçnıñ advokatı Sergey Zatsevniñ aytqanlarından alıntı ketire.
Onıñ sözlerine köre, bu şikâyet Danılovıçnıñ vaziyetini deñiştirmez, amma o, Rusiyege qarşı halqara tazyığını arttıra bile.
"Rusiyeniñ Avropa Şurasından quvulması bir şey yapmamaq kerekmiz demek degil. Küreş Rusiye basqılarından azap çekkenler içün müidir. Bu muracaat İrınanıñ vaziyetini deñiştirmese bile, halqara tazyığı içün küreş müimdir ve ertemi keçmi Rusiye oña cevap bermek kerek olacaq", - dep qoştı advokat.
Martnıñ 22-nde Qırımda 7 yıl apis cezasına mahküm etilgen vatandaş jurnalisti ve emşire İrına Danılovıç "normal tibbiy tedaviylev kösterilgenine qadar ya da ölgence" quru açlıq aktsiyasını ilân etken edi.
Emşire ve vatandaş jurnalisti keçken sene aprelniñ 29-nda işten evge qaytqanı zaman Rusiye quvetçileri tarafından yaqalanğan edi. İrınanıñ Aqmescit tahqiqat tevqifhanesinde olması yalıñız 13-ünci kün belli oldı. Bütün bu vaqıt tuvğanları ve tanışları onı tapmağa tırışa edi. Olarğa Köktebelniñ kenarındaki yaqıt stantsiyalarından birinde tapılğan İrınanıñ tutıp esir etilmesiniñ video yazısı yardım etti. Video adiy urbağa kiyingen bir qaç kişiniñ İrınanı arabağa nasıl itep oturtqanlarını köstere. Bu video esasında faalniñ babası Rusiye polisine ariza ile muracaat eterek, adam tutıp esir etilmesi faktı ile bağlı cinayet davasınıñ başlanmasını talap etti.
Danılovıç emşire olıp çalışa edi, içtimaiy ağlarda saifesi ve bir qaç bloger yazısı bar edi. Yazğanları esasen sağlıq hadimleri ve işğal altındaki yarımadada sağlıq problemlerinen bağlı edi.
2022 senesi dekabrniñ 28-nde Qırımdaki Rusiye mahkemesi vatandaş jurnalisti ve emşire İrına Danılovıçnı yedi yıl apis cazasına makhüm etti. Mahkeme qadınnı Rusiye Ceza Qanunnamesiniñ 222.1 maddesi ile «Patlayıcı madde ya da patlayıcı cihazlarnı qanunsız satın aluv, berüv, satuv, saqlav, taşuv, yollav ya da yanında taşımasında» qabaatlı tanıdı. Apis cezasından ğayrı qadın 50 biñ ruble para cezasını berildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
