Sentâbr 11-inde Avropa İnsan aqları mahkemesinde Rusiye ilhaq etken Qırımda qanun bozmaları aqqında şikâyet boyunca diñlevler keçti.
Avropa İnsan aqları mahkemesinde, bu davanıñ teşebbüsçisi olğan Ukrainanı, Avropa İnsan aqları mahkemesi işleri boyunca vekâletli İvan Lişçin temsil ete edi. O, hususan, "Qırımda ukrainler siyasiy ve diniy sebepler ile taqip etilgenini" ayrıca ayttı. Taqibatqa eñ çoq oğrağan gruppalar dep, o, etnik ukrainlerni ve qırımtatarlarnı ayttı.
"Rusiye aselet siyasiy taqibat kampaniyasını keçire, onıñ maqsadı – er türlü tirenüvni yoq etmektir", – yaza Lişçinniñ sözlerinden Ukrinform.
Adliye naziriniñ muavini olğan Mihail Galperin temsil etken Rusiye tarafı, Kyivniñ Avropa İnsan aqları mahkemesine şikâyetinde "siyasiy sebep bar" dep öz çıqışında ayttı.
"Rusiye askerleri sadece zorbalıqqa yol bermediler, amma Qırımda tolusınen semereli nezaretni yapmadılar", - dep yaza Galperinniñ sözlerinde "TASS". O, öz nutqunda, "ordular Qırımda qanuniy şekilde olğanını" ayttı.
Galperinniñ fikrince, Qırımda referendumnı keçirmege, Ukraina partiyalarınıñ "qanda battırmaq" çağıruvları sebep oldı.
O dedi ki, Ukrainanıñ maruzasında "ciddiy qabaatlavlar toplanğan, amma kerçek tahqiqat ve deliller yoq".
Çarşenbe künü, sentâbr 11-inde, Avropa İnsan aqları mahkemesiniñ Büyük palatası, "Rusiyege qarşı Ukraina (Qırım)" davası boyunca diñlevlerni açtı.
2018 senesi avgust 10-unda Ukraina, Kremlniñ ukrain mabüslerine dair devletlerara şikâyetnen Avropa İnsan aqları mahkemesine muracaat etti.
