Avropa parlamentiniñ deputatları Rusiye SİZOsında ve koloniyasında tutulğan dört qırımlığa «birdemlik mektübini» yazdı. Bu aqta Avropa parlamentiniñ Çeh Cumhuriyeti azası, «Çeh korsan firqasınıñ» vekili Marketa Gregorova Facebookta bildirdi.
Mektüpler Rusiye mahkemeleri tarafından mahküm etilgen kezlevli solcı faal Yevgeniy Karakaşev ve «İyegova şaatları» diniy teşkilâtınıñ faaliyetinde qabaatlanğan Canköy sakini Sergey Filatovğa yollanıldı. Avropa deputatları Aqmescitteki «Hizb ut-Tahrir davası» boyunca mahküm etilgen cemaat jurnalistleri Osman Arifmemetov ve Remzi Bekirovğa da mektüp yazdı.
«Şimdi dünya diger meselelerni çeze, amma RUsiye alâ daa Qırımnı işğal ete ve qarşı çıqqanlarnı apishanelerde tuta, bunı unutmamaq kerek. Avropa parlamentiniñ diger deputatlarınen beraber olarğa maneviy destek berecek «birdemlik mektübini» imzalamağa qarar berdik», – dep bildirdi Avropa deputatı Facebookta.
Gregorova, Rusiye apishanelerinde tutulğan qırımlılarğa ve tutulğan Beyazrusiye muhalifetçilerine mektüp yazmağa çağırdı. O, apiste yatqan dört qırımlınıñ poçta adreslerini derc etti.
Rusiye kontrolindeki Canköy rayon mahkemesi 2020 senesi martnıñ 5-nde yerli sakin, «İyegova şaatlarınıñ» azası Sergey Filatovnı altı yıl umumiy rejim koloniyasında qalmasına üküm etti.
2019 senesi aprelniñ 19-nda Rostov-na-Donudaki Şimaliy-Kavkaz okrugınıñ arbiy mahkemesi (şimdi Cenübiy okrugınıñ arbiy mahkemesi) «VKontakte» içtimaiy ağında terrorizmge çağırğanında qabaatlanğan Yevgeniy Karakaşevni 6 yıl umumiy rejim koloniyasında qalmasına üküm etti.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Tutulğanlar arasında qırımtatar cemaat jurnalistleri Osman Arifmemetov ve Remzi Bekirov bar ediler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
