Avropa Birliginiñ Rusiyege qarşı Qırım işğali ve Ukraina topraq bütünliginiñ bozuluvı sebebinden kirsetilgen sanktsiyaları daa dört memleket qoşuldı – Montenegro, Arnavutlıq, Norvegiya ve Lihtenşteyn. Bu aqta BM çetel işleri ve telükesizlik siyaseti Yuqarı vekili Josep Borrellniñ beyanatında aytıla.
«Avropa serbest ticaret birligi ve Avropa iqtisadiy alanğa ait namzet memleketler Montenegro ve Arnavutlıq, Lihtenşteyn ve Norvegiya AB Şurasınıñ bu qararına (Rusiyege qarşı sanktsiyalar – QA) qoşuldı. Olar Birlikniñ bu qararına devlet siyasetini uyğunlaştıracaq. Avropa Birligi böyle mecburiyetlerge emiyet bere ve olarnı alğışlay», – dep aytıla haberde.
Hatırlatamız, bu künleri qomşu Rusiyeniñ prezidenti Vladimir Putin Ukraina ve ğarbiy memleketlerniñ Qırım işğali sebebinden kirsetilgen tedbirlerge cevap olaraq iqtisadiy sanktsiyalarnı uzattı. Böyle buyruq Rusiye uquqiy malümat portalında derc etildi.
AB Ukraina temsilciligi, Avropa parlamentiniñ çetel işleri Komiteti Avropa Parlamentiniñ Ukraina maruzasını tasdıqladı, dep bildirdi. Anda Rusiyege qarşı sanktsiyalarnı saqlamaq niyetleri ve Qırımnı işğalden qurtaruv muzakerelerine başlamaq çağıruvları aqqında aytıla.
2021 senesi mayıs ayında Kyivde Qırımnı işğalden qurtaruv halqara sammitini keçirmege planlaştırıla. Bir çoq memleket, hususan Türkiye, ABD ve Baltiya memleketleri iştirak etmege meraqlı olğanını bildirdi, Kyiv Rusiyeni de muzakere masasına davet etmege niyetlene.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
