Ukraina Tış işler naziri Dmıtro Kulebanıñ fikirince, Avropa Birliginde Qırım vekili vazifesi acele açılmalı. Bu aqta o, «Anadolu Ajansına» bildirdi.
Kulebanıñ fikirince, AB Ukraina içün yahşı ortaq ola ve zıddiyet başlağanından berli memleketke qol tuta.
«AB Qırım mahsus vekili vazifesi olsun ister edik. Bu buhranlar Avropağa yaqın olsa da, olar Avropada da ola ve ayrı diqqatqa lâyıq», – dep añlattı Ukraina naziri.
Kuleba, Qırım işğalinden soñ Kreml yarımadanı «ruslaştırmağa» tırışa, dep qayd etti.
«Qırımtatar Milliy Meclisi – temsiliy organı – yasaqlandı. Ukrain tilinde tasil Qırım mektep talebeleriniñ ancaq 0,2%-ında bar. Bu halqara gumanitar uquqnı boza», – dep qayd etti o.
Kuleba, «Rusiye nasıl olsa Qırımdan ketecek, Ukraina ise suverenitetini qaytaracaq», dep eminliknen bildirdi.
2020 senesi noyabrniñ 18-nde BM Baş Assambleyasınıñ Komiteti Qırımda insan aqlarınıñ bozuluvını takbih etken quvetleştirilgen qararnı taqdirledi. Rey berüvden soñ Ukraina Tış işler naziri Dmıtro Kuleba OSCE ve BM insan aqları missiyasını Rusiye işğal etken Qırımda monitoringni quvetleştirmelerine çağırdı.
Rusiye Tış işler nazirligi qabul etilgen Qırım qararı leyhasınıñ «siyasetniñ tesiri altında qaldı», dep bildirdi.
Ukraina akimiyeti AB ve Ğarp memleketlerini Yarımadanı işğalden qurtaruv Qırım platformasında iştirak etmesine faal sürette celp ete. Tış işler naziri Dmıtro Kuleba, Qırımnı işğalden qurtaruv sammitini Kyivde 2021 senesiniñ mayıs başında ötkermege planlaştırıla, dep bildirdi.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.
