Frenkistan ve İspaniya İtaliyağa baqıp, koronavirus pandemiyası ile küreş içün fevqulâde tedbirlerni ilân etti. 63 millionlıq Frenkistan martnıñ 14-nden 15-ne keçer gecesi ilk derece, ayatiy emiyeti olmağan bütün cemaat yerlerini qapata, dep bildire Azatlıq Radiosı.
47 millionlıq ealisi olğan İspaniyada martnıñ 14-nden 15-ne keçer gecesi şeer sakinleriniñ areketi sıñırlana. İspaniyada qırğınlıq tarqaluv vaziyeti – İtaliyadan eñ zordır: 6 biñden çoq hasta, 191 kişi öldi.
1440 insan can bergen İtaliya keçken bazarertesi künü qoruv tedbirlerini alaraq, memlekette müessiselerni qapatıp, naqliyat, insan areketini sıñırladı. ABD Avropa ve Avropadan, şu cümleden Büyük Britaniya ve İrlandiyadan ziyaretlerni yasaqlamağa qarar aldı – salı künü Greenwich saatınen 4:00-dan başlap.
Dünya sağlıq teşkilâtı Avropanı pandemiya tarqalğan esas merkez dep adlandırdı. DST yolbaşçısı Tedros Adhanom Gebreisus devletlerni insanlarnıñ ayatlarını qurtarmaq içün «sert tedbir alıp», «cemaatnıñ mobilizatsiyasını» ve «içtimaiy uzaqlaştıruvnı» qullanmağa çağırdı.
Koronavirus ile küreş çerçivesinde 49 memleket bütün mekteplerni qapattı ya da qapata, dep bildire UNESCO. İsviçre memleketlerni eñ azından aprelniñ 4-ne qadar qapata. Almaniyada mekteplerniñ çoqusı bazarertesi kününden itibaren qapalı olacaq.
