Avropa Birliginde Çin elçisi Fu Tsun, memleketiniñ Ukrayinanıñ 1991 senesi sıñırlarına irişmek ve topraq bütünligini tamamınen ğayrıdan tiklemek istegini desteklemekni istisna etmegenini bildirgen. Bunı Al Jazeera haber ete.
Çin Halq Cumhuriyetiniñ temsilcisine Ukrayinanıñ öz topraqlarını qaytarmağa tırışqanı ve Pekinniñ bunı desteklep desteklememesi ile bağlı berilgen sualge şöyle cevap berdi: "Olmaması içün iç bir sebep körmeyim".
"Biz bütün memleketlerniñ topraq bütünligini ürmet etemiz. Şunıñ içün Çin, eski Şuralar Birligi ile munasebetler qurğanda böyle añlaştıq. Amma men endi aytqanım kibi bu tarihiy meseleler, olar Ukrayina ve Rusiye arasında muzakere etilmeli, biz böyle işlerge kirişmeymiz", - dedi o.
Neşirniñ qayd etkenine köre, diplomat Ukrayinanıñ topraq bütünligini desteklegeni artıq ilk sefer degil. Aprel ayında o, The New York Times gazetine intervyü berir eken, Pekin işğal etilgen topraqlarnı Rusiyeniñki kibi tanımaycağını bildirgen edi.
Diger Çin memurları Rusiyeniñ Ukrayinağa qarşı tecavuzı ile balğı suallerge doğru cevap bermekten özüni tutalar.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
