Avropa Birligi ortaq memleketlerine koronavirus pandemiyası ile küreşlerine 15,6 milliard euro bermege qarar aldı, Ukraina içün 190 mln euro berilmesi planlaştırıla. Bu aqta Azatlıq Radiosı haber ete.
«Bugün Avropa Komissiyası ve Yuqarı vekili Avropa Birliginiñ memleketlerniñ koronavirus ile küreşte ğayretlerine qol tutuvına işançlı ve maqsatlı destek planını azırladılar. Avropa Birliginiñ areketleri ortaq memleketleriniñ peyda olğan sağlıq ve gumanitar ihtiyacları saasındaki buhrannı al etüv, sağlıq, suv ve sanitariya sistemalarınıñ pekitilüvi, olarnıñ pandemiya ile küreşke azırlıq ve tedqiq içün imkânlar, içtimaiy-iqtisadiy tesir yımşatıluvına celp etilecektir. Bu areketlerge qol tutmaq içün Avropa Birligi tış faaliyet resursları sayesinde ortaq memleketlerine 15,6 mlrd eurodan çoq maddiy yardım kösterecek», – dep aytıla Avropa komissiyasınıñ matbuat hızmeti haberinde.
Avropa komissiyasınıñ malümatına köre, Ukraina kirgen «Şarqiy işbirligi» memleketlerine Avropa Birligi 962 mln euro ayıracaq, olardan 190 million Ukraina içündir.
«Ukrainağa – 190 mln euro acele ve qısqa müddetli ihtiyaclarına qol tutmaq içün», – dep aytıla haberde.
Martnıñ 30-nda haber etilgenine köre, Avropa Birligi Ukrainağa koronavirus ile küreşine 80 mln euro berecek.
Amerika Birleşken Devletleri ise Ukrainağa 1,2 million dollar fiyatında tibbiy ve gumanitar yardım yollaycaq, dep bildirdi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
