Avropa Birligi Ukrayinada cenk başlanğandan soñra altıncı sanktsiyalar paketi çerçivesinde Rusiyege qarşı neft embargosı qoymağa planlaştıra. Avropa Birligi memleketlerinde üç devlet televizion kanalınıñ yayınlavını yasaq etilecek, "Sberbank" ve daa eki büyük bank SWIFT sistemasından kesilecek. Bunı Avropa komissiyasınıñ yolbaşçısı Ursula von der Leyen haber etti.
Bundan ğayrı, AB Kıyiv civarındaki Buça mesken yerinde arbiy cinayetlerde iştirak etkeninde şübeli sayılğan Rusiye vatandaşlarını ileride mesüliyetke celp etmek içün olarnıñ cedvelini tizecek ola. Agence France-Presse, Rusiye ortodoks kilsesiniñ patriarhı Kirill (Gundâyev) de sakntsiyalar cedveline kirsetilecegini bildire.
Rusiye ihracına pek bağlı olğan eki memleket - Macaristan ve Slovakiya içün neft embargosı ile bağlı maddede istisna olacağı tahmin etile. Olar 2023 senesiniñ soñuna qadar mevcut muqaveleler esasında Rusiyeden neft ala bilecekler.
Sanktsiyalarnıñ quvetini alması içün bütün AB memleketelri tarafından tasdıqlanmalıdır.
AB memleketleriniñ ekseriyeti Kremlniñ Ukrayinadaki cenkke para berip olması imkânlarını sıñırlamaq içün Rusiyeniñ energiya italâtın kesmek içün çareler köre. Sadece Macaristan bu yapmaqtan red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
