Avropa Birliginiñ tış işler Yuqarı vekiliniñ resmiy temsilcisi Josep Borrellniñ bildirgenine köre, Avropa Birligi Qırım ve Aqyarda Rusiye qarnunlarınıñ qullanıluvını tanımay ve Rusiyeni tutulğan bütün ukrainalılarnı azat etmesine çağıra, dep yaza Azatlıq Radiosı.
Böylece, Avropa Birligi Rusiye mahkemesiniñ yanvarniñ 12-nde Qarasuvbazardaki «Hizb ut-Tahrir davası» mabüsleri, qırımtatar musulmanlarını büyük apis cezalarına üküm etkenini cevap berdi.
«Tünevin Rostov-na-Donu Cenübiy okrugınıñ arbiy mahkemesiniñ üç qırımtatarına çıqarğan ükmüni bilemiz. Avropa Birligi Qırım ve Aqyarda Rusiye qanunlarınıñ qullanılmasını tanımay, çünki o, halqara uquqnı boza. Rusiyeni qanunsız tutulğan bütün ukrainalılarnı acele etmesine çağıramız. Avropa Birligi Ukraina mustaqilligi, suvereniteti ve topraq bütünligine onıñ halqara seviyede tanılğan sıñırlarında qatiyen qol tuta», – dep aytıla beyanatta.
Bundan evel ABD elçihanesi yanvarniñ 12-nde Rusiyedeki mahkeme tarafından qırımtatarlarğa çıqarılğan ükümni takbih etti. Avropa elçileri de Qarasuvbazardaki «Hizb ut-Tahrir davası» mabüsleriniñ ükmüni takbih etti.
Yanvarniñ 12-nde Rusiye mahkemesi Qarasuvbazardaki «Hizb ut-Tahrir davası» mabüslerini sert rejim koloniyasında qalmalarına üküm etti. Enver Ömerov 18 yılğa, Ayder Cepparov 17 yılğa, Riza Ömerov 13 yılğa üküm etildi. Mahkümler qabaatlarını tanımay.
Ukraina ombudsmeni Lüdmila Denisova qırımlılarğa çıqarılğan ükümni takbih etti, Ukraina Tış işler nazirligi ise Rusiyeden mahkeme qararını lâğu etmesini ve qırımtatarlarnı azat etmesini talap etti. Rusiye tarafı Ukraina nazirliginiñ beyanatına daa cevap bermedi. Qırım Muhtar Cumhuriyeti ve Aqyar prokuraturası Rusiye mahkemesiniñ ükmüni «daa bir repressiya dalğası» dep adlandırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
