Avropa Birligi Yaltadaki «Hizb ut-Tahrir davasına» istinaden mahküm etilgen Emir-Usein Kuku, Ukraina tarafdarı faali Oleg Prihodko ve Rusiyede ve işğali altındaki Qırımda qanunsız tutulıp mahküm etilgen bütün Ukraina vatandaşlarını azat etmege çağıra. Bu aqta Avropa Birliginiñ «referendum» yılı munasebetinen aydınlatqan beyanatında aytıla.
«Avropa Birligi yarımadada insan aqları saasında halqara standartlarğa tolusınen riayet etilüvine çağıra. Jurnalist, aq qorçalayıcı ve advokatlarnıñ mustaqil bir şekilde ve sebepsiz mania ve qorquzuvsız çalışmaq imkânı olmalı», – dep aytıla vesiqada.
Avropa Birligi, Rusiyeni halqara aq qorçalayıcılarnıñ yarımadağa kirişine yol bermesine çağıra.
Daa evel Avropa Biroigi Ukraina topraq bütünligine qoltutıp, Qırımda halqara uquq bozuvlarını takbih etken edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
