Avropa Birliginiñ Tış işler ve telükesizlik siyasetinden Yuqarı temsilcisi, Avropa komissiyasınıñ vitse-prezidenti Josep Borrell, Avropa Birligi “avtoritar bir yol” ile ketken Rusiyege qarşı yañı sanktsiyalar qoya bile, dep saya. Bunı Azatlıq.Radiosı haber ete.
Onıñ aytaqanına köre, Rusiye bazı AB azaları arasında ziddiyet doğurmaq içün areket ete ve Brüksel ileride Rusiyege qarşı yañı sanktsiyalar qoysa bile, Moskva ile daimiy cebeleşüv olmamaq kerek.
“Aza devletler ilerideki adımlar nasıl olacağına qarar bermeliler. Elbette, bu sanktsiyalar da ola bile”, – dedi Borrell.
Borrellniñ fikrince keçken afta Moskvağa ziyareti, Rusiye “avtoritar bir yol” ile ketkenini köstergen.
“Rusiyedeki mevcut akimiyet qurulışı iqtisadiy, arbiy menfaatlarnı ve siyasiy nezaretni birleştire ve demokratik qanunlarnıñ üstünligi içün yer qaldırmay”, – dedi o.
Avropa Birliginiñ Tış işler ve telükesizlik siyasetinden Yuqarı temsilcisi, Avropa komissiyasınıñ vitse-prezidenti Josep Borrell, Rusiye Tış işler naziri Sergey Lavrov ile laf etkende Minsk añlaşmalarınıñ tam şekilde amelge keçirilmesini talap etken edi.
Evel, Avropa Birliginiñ Tışı işler ve telükesizlik siyasetinden Yuqarı temsilcisi, Avropa komissiyasınıñ vitse-prezidenti Josep Borrell, Avropa Birligi ve Rusiye arasında munasebetler soñki on yıl içinde fenalaştı, Qırım işğal etilgen soñ ise daa ziyade muşkulleşti, dep bildirgen edi.
Fevralnıñ 2-nde, Josep Borrell Rusiyege ziyareti arfesinde Ukraina TİN başı Dmıtro Kuleba ile telefonnen laf etken edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
