Avropa Birligi Rusiyeni halqara mecburiyetlerini yerine ketirmege — tutulğan Ukrayina vatandaşlarını azat etmege, azatlıqtan marum etilgen bütün ukrayinlerniñ adları ve bulunğan yerleriniñ cedvellerini bermege çağıra. Bu aqta Avropada Telükesizlik ve İşbirlik Teşkilâtınıñ Daimiy şurasınıñ Viyanadaki toplaşuvınıñ neticelerinden soñ berilgen beyanatta aytıla.
"Rusiye, em Ukrayinanıñ vaqtınca işğal etilgen topraqlarında, em de Rusiyede ukrayinler tutulğan bütün obyektlerge Halqara Qızıl Haç Komitetine acele, telükesiz ve maniasız irişimni temin etmeli", — dep qayd eteler OSCE şurasında.
Beyanatta qayd etilgenine köre, ğayıp olğan Ukrayina vatandaşlarınıñ meselesi, Rusiye tarafından sürgün etilgen soñ ğayıp olğan biñlernen ukrayin balalarınıñ vaziyetinen bağlıdır. Qayd etilgenine köre, Rusiye "ölgen balalarnıñ qorantalarını qayd etmek, taqip etmek, bağlanmaq ve bağlarnı ğayrıdan tiklemek vazifelerini ve mecburiyetlerini eda etmey ve olarnıñ vaziyetini daa beter ete".
Beyanatta Rusiyeniñ ğayıp olğanlarnı qıdıruv ve identifikatsiya etüv boyunca Ukrayinanıñ ğayretlerine, şu cümleden Rusiyeniñ qıdıruv gruppalarına Ukrayinanıñ işğal etilgen topraqlarını ziyaret etmek içün kiriş ya da telükesizlik kefaletini bermemesi aqqında da aytıla.
Avropa Birliginde qayd eteler ki, eñ azından 28 biñ Ukrayina vatandaşı resmiy olaraq ğayıp olğan sayıla.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
