Avropa Birligi Rusiye Devlet Dumasınıñ saylavları ögünde «qorquzuv müitini» takbih ete ve Qırımdaki rey berüv neticelerini tanımay.
Bu aqta sentâbrniñ 20-nde AB çetel işleri resmiy vekilm Peter Stano ayttı, dep haber ete AFP.
«Bu saylavlar ögünde körgenlerimiz tenqit etken mustaqil seslerni qorquzuv müiti edi», – dedi Stano.
Onıñ aytqanına köre, «halqara mustaqil közetüv olmadı, şunıñ içün saylavlar nasıl keçirilgenini körmek pek qıyın».
«Amma halqara yerli közeticilerniñ esabatları bar, olar bu saylavlarda olğan bir çoq bozuv aqqında bildirdi», – dep qoştı Stanov.
«Yevropeyska pravda» haberine köre, Stano, «AB işğal altındaki Qırımda keçirilgen Rusiye saylavlarınıñ neticelerini bir vaqıt qabul etmeycek», dep qayd etti.
«Çünki Qırım Ukraina ola. Kyiv kontrol etmegen Donbas topraqlarında insanlarğa bu saylavlarda rey bermeleri içün Rusiye pasportları berilgeni içün qasevetlenemiz. Bu Minsk añlaşmalarına zıt kele», – dep bildire aytqanlarını neşir.
Rusiye Devlet Dumasınıñ saylavları sentâbrniñ 17-nden 19-na qadar keçirildi, işğal etilgen Qırımda ve Aqyarda da rey berüv teşkil etildi. İşğal etilgen Donetsk ve Lugansk vilâyetleri rayonlarınıñ sakinlerine Rusiye saylavlarında iştirak etsinler dep, Rusiye pasportları berildi.
Sentâbrniñ 17-nde Ukraina Tış işler nazirligi Qırımda teşkil etilgen Rusiye saylavlarına ve işğal etilgen Donetsk ve Lugansk vilâyetleri rayonlarınıñ rey berüvge celp etilmesine qarşı narazılıq bildirdi. Ukraina milliy telükesizlik ve mudafaa şurası işğal etilgen Donbastan ve Qırımdan kösterilgen 33 namzetke qarşı sanktsiyalar kirsetti.
Ukraina milliy telükesizlik ve mudafaa şurası Qırımda ve Donbasta Rusiye Devlet Duması saylavlarında komissiya erkânına kirgen, teşviqatçılar, namzetler ve közeticilerge qarşı sanktsiyalar kirsetmege vade ete.
Rusiye Qırımnı Rusiye toprağı dep saya ve, Rusiye prezidentiniñ matbuat kâtibi Dmitriy Peskov 2016 senesi bildirgenine köre, halqara toplulıqnıñ işğal altındaki yarımadada saylavlarnıñ keçirilüvine bergen cevabına «qulaq asmay».
