Link açıqlığı

Saatnıñ esas haberi

Avropa Birligi, Qırımda Rusiye saylavlarınıñ keçirilüvine alâqası olğanlarğa qarşı sanktsiyalarnı kirsetmege niyetlene


Avropa Birligi 2019 senesi sentâbr ayında Qırımda Rusiye yerli saylavlarınıñ keçirilüvine alâqası olğan yedi insanğa qarşı sanktsiyalarnı kirsetmege niyetlene. Bu aqta Azatlıq Radiosınıñ mühbiri haber etti.

«Yarın (yanvarniñ 28-nde) Avropa Birligi Ukraina topraq bütünligini bozğan şahıslarğa qarşı sanktsiyalar cedveline daa 7 insannı qoşaycaq. 7 kişi sentâbr ayında Qırımda regional saylavlarnıñ keçirilmesine yardım etti ve olarda iştirak etti», – dep aytıla Rikard Jozwiakniñ Twitter haberinde.

Sanktsiyalar kirsetilecek insanlarnıñ adları şimdilik belli degil.

Rusiye akimiyeti Qırım ve Aqyarda 2019 senesi sentâbrniñ 8-nde Qırım parlamenti ve yerli şuralarnıñ deputat saylavlarını keçirdi.

Ukraina Tış işler nazirligi işğal etilgen Qırımda ve Aqyarda keçirilgen Rusiye saylavlarını «uquq ceetinden sayılmaz» dep adlandırıp, halqara toplulıqnı bu saylavlarğa «printsipial qıymet kesmesine» çağırdı.

Avropa Birligi Qırım ve Aqyardaki saylavlarnı tanımadı.

Sentâbrniñ 11-nde Ukraina Yuqarı Radası Qırım ve Aqyardaki Rusiye saylavlarını qanunsız tanıdı.

2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.

2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.

Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.

XS
SM
MD
LG