Avropa Birliginiñ nazirleri, işğal etilgen Qırımda ve Aqyarda Rusiye yerli saylavlarınıñ keçirilüvi sebebinden Ukraina topraq bütünligini bozğanından mesüliyetli olğanlarnıñ sanktsion cedveline 7 Rusiye memurını qoşmağa qarar aldı. Bu aqta Azatlıq Radiosınıñ mühbiri Rikard Jozwiak haber ete.
Sanktsiyalarğa oğraycaq memurlarnıñ adları şimdilik belli degil. Sanktsion cedvel artıq 177 insandan ve 44 şirketten ibaret.
Rusiye akimiyeti Qırım ve Aqyarda 2019 senesi sentâbrniñ 8-nde Qırım parlamenti ve yerli şuralarnıñ deputat saylavlarını keçirdi.
Ukraina Tış işler nazirligi işğal etilgen Qırımda ve Aqyarda keçirilgen Rusiye saylavlarını «uquq ceetinden sayılmaz» dep adlandırıp, halqara toplulıqnı bu saylavlarğa «printsipial qıymet kesmesine» çağırdı.
Avropa Birligi Qırım ve Aqyardaki saylavlarnı tanımadı.
Sentâbrniñ 11-nde Ukraina Yuqarı Radası Qırım ve Aqyardaki Rusiye saylavlarını qanunsız tanıdı.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
