Avropa Birligi, Brüsselde «Ukraina topraq bütünligi, suvereniteti ve mustaqilligine zarar ketirgen» şahıs ve teşkilâtlar olaraq tanılğanlarğa qarşı sanktsiyalarnı uzattı. Bu aqta Avropa Birliginiñ resmiy neşirinde aytıla.
182 insan ve 135 teşkilâtnıñ bank areketleri sıñırlana, olarnıñ Avropa Birligine kirişi de yasaqlana, dep haber ete Azatlıq Radiosı.
Sanktsiyalar kene yarım yılğa uzatıla. Keçken sefer bu 2019 senesi sentâbrniñ 13-nde yapılğan edi.
2020 senesi yanvar ayında Avropa Birligi nazirleri işğal etilgen Qırım ve Aqyarda Rusiye yerli saylavlarınıñ keçirilüvi sebebinden Ukraina topraq bütünligini bozğanından şübhelilerniñ sanktsion cedveline 7 Rusiye memurını qoşmağa qarar aldı.
Şahıs ve şirketlerge qarşı şahsiy sanktsiyalar çerçivesinde Avropa Birligine kiriş yasaqlana ve bank areketleri toqtatıla.
Bu sıñırlav tedbirleri Avropa Birliginde «Ukraina topraq bütünligi, suvereniteti ve mustaqilligini bozğan» olaraq tanılğan şahıs ve teşkilâtlarğa qarşı ilk sefer 2014 senesi mart ayında kirsetilgen edi. O vaqıttan berli sanktsiyalar er yarım yıl uzatıla.
