Avropa Birliginiñ Şurası sentâbrniñ 10-nda Ukrainanıñ topraq bütünligi, suvereniteti ve mustaqilligine zarar ketirgen şahıs ve teşkilâtlarğa qarşı şahsiy sanktsiyalarnı yarım yılğa uzatmağa qarar aldı, dep yaza Azatlıq Radiosı.
«Sıñırlağan tedbirler em ziyaretlerni sıñırlay, em aktivlerni buzlata ve, eskisi kibi, 175 insan ve 44 teşkilâtqa qarşı qullanılacaq», – dep aytıla AB Şurasınıñ haberinde.
Vesiqada aytılğanına köre, sanktsiyalar 2021 senesi martnıñ 15-ne qadar devam etecek. Sentâbrniñ 11-nde qararlar AB Resmiy mecmuasında derc etilmeli.
Azatlıq Radiosınıñ mühbiri bildirgenine köre, tezden bu sanktsiyalar cedveline Keriç köprüniñ qurulmasınen bağlı 15 insan ve teşkilât ilâve etilecek.
Bundan evel berilgen malümatqa köre, Qıbrız Keriç köprüniñ qurucılığı sebebinden kirsetilgen Avropa Birligi sanktsiyalarını blok ete. Avropa Birligi, 2018 senesi iyül ayında bu köpürniñ qurucılığında iştirak etken şirketlerge qarşı sanktsiyalarnı kirsetti.
İyünniñ 18-nde Ukraina Tış işler naziri Dmıtro Kuleba bildirdi ki, Avropa Birligi Şurası Qırım işğali sebebinden Rusiyege qarşı sanktsiyalarnı bir yılğa uzattı.
Sanktsiyalar 2014 senesi Rusiyeniñ Ukrainağa ait yarımada işğaline cevap olaraq kirsetildi. O vaqıttan berli olarnı bir qaç kere uzatıp kenişlettiler.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
