Avropa Birligi Qırımda Rusiye kontrolindeki mahkeme tarafından Qırımtatar Milliy Meclisiniñ reisi Refat Çubarovğa çıqarılğan ükümni tanımay. Bu aqta Avropa Birligi Tış siyaset hızmetiniñ resmiy vekili Peter Stanonıñ iyünniñ 3-nde aydınlatılğan beyanatında aytıla.
«Avropa Birligi Qırımnıñ Rusiye tarafından qanunsız ilhaq etilüvini tanımay, ve şunıñ içün qanunsız mahkemeniñ bu «ükmüni» tanımay ve tanımaycaq. Çubarov bey efendige çıqarılğan üküm insan aqlarınıñ ciddiy bozuluvı ve Rusiye «akimiyetiniñ» qırımtatar cemiyetini taqip etkeniniñ daa bir örnegi ola», – dep aytıla beyanatta.
Stano aytqanına köre, Qırımda Çubarovğa qarşı çıqarılğan üküm «Qırım yarımadasında qanunsız ilhaqtan soñ insan aqları ciddiy seviyede fenalaşqanını köstere».
AB tış siyaset hızmeti Rusiyeni Meclis faaliyetiniñ yasağını lâğu etmege çağırdı.
«Avropa Birligi Qırım yarımadasında qanunsız tutulğan bütün Ukraina vatandaşları acele sürette azat etilmeli, dep tekrarlay», – dep aytıla beyanatta.
Advokat Nikolay Polozov Rusiye akimiyeti kontrolindeki Qırım Yuqarı mahkemesiniñ Qırımtatar Milliy Meclisiniñ reisi Refat Çubarovğa çıqarğan ğıyabiy ükmüne qarşı istinaf şikâyetini berdi, dep bildirdi. Üküm çıqarılğan soñ Qırımtatar Milliy Meclisiniñ tayinlengen advokatı Aleksandr Osokin da ğıyabiy ükümni şikâyet etecek, dep bildirdi. Ukraina Tış işler naziriniñ birinci muavini Emine Ceppar işğal etilgen Qırımda Qırımtatar Milliy Meclisiniñ reisi Refat Çubarovğa qarşı esnasnı ve çıqarılğan ğıyabiy ükümni «ayıp mahkeme» dep adlandırdı.
Qırım Muhtar Cumhuriyeti ve Aqyar prokuraturası Çubarovğa qarşı mahkeme ükmüni «qanun ve cenk adetleriniñ bozuluvı» olaraq tasnif etti.
Çubarov Qırım.Aqiqat Radiosınıñ yayınında Aqmescitte çıqarılğan mahkeme ükmüni «uquq ceetinden boş» dep adlandırdı. O, Avropa insan aqları mahkemesine muracaat etmege niyetlene, dep bildirdi.
Mayısnıñ 24-nde olıp keçken oturışuvda qabaatlav Çubarov içün 9 yıl apis cezası berilmesini istedi. Meclis reisi qabaatlav tarafınıñ talabını izaatlap, Qırımdaki «mahkeme» onıñ ayatına tesir etmeycek, dep ayttı.
2020 senesi martnıñ soñunda Qırımdaki Rusiye Tahqiqat komitetiniñ idaresi Çubarovnı ğıyabiy şekilde qabaatladı. Cinaiy davalar Rusiye Ceza kodeksiniñ 212-nci maddesiniñ 1-inci maddesine (qalabalıqlarnı teşkil etüv), 280.1-inci maddesiniñ 2-nci qısmı, 280.1 maddesiniñ 1-inci qısmına istinaden (Rusiye topraq bütünligini bozacaq areketlerge çağıruv) açıldı.
Bıltır iyül ayında Aqmescitteki mahkeme Çubarovğa qarşı cinaiy davanı temelden baqıp başladı. Tayin etilgen advokat Aleksandr Osokin Qırımtatar Milliy Meclisiniñ reisine qarşı mahkemeni şikâyet etti.
Çubarovnıñ qayd etkenine köre, Rusiye akimiyeti «qırımtatar halqına qarşı yañı repressiya dalğasını başlattı».
Ukraina Yuqarı Radasınıñ İnsan aqları vekâletlisi Lüdmila Denisova bu davanı qanunsız dep adlandırdı.
Qırım Muhtar Cumhuriyeti ve Aqyar prokuraturası Rusiye tahqiqatçılarınıñ Çubarovğa qarşı açqan cinaiy dava sebebinden tahqiqat başlatqan edi.
