Avropa Birligi maqsadına irişti, dep bildire: yaznıñ soñuna qadar 27 memlekette yaşı yetken ealiniñ 70%-ı COVID-19-dan aşı oldı, dep haber ete Azatlıq Radiosı.
Avgustnıñ 31-nde Twitterde derc etilgen haberde Avropa komissiyasınıñ prezidenti Ursula Gertrud von der Leyen 250 milliondan çoq insan aşı oldı, dep bildirdi. O, bunı «büyük ğalebe» dep adlandırdı ve ileri ketmek kerek, dep qoştı. AB aşılav kampaniyası aşı yetmegeni ve ketirilmesi keç qalğanı içün yavaş-yavaş başlağan edi, şimdi ise dünyada eñ muvafaqiyetlilerden sayıla.
Avgustnıñ 30-nda Avropa Birligi, aza memleketlerine Amerika Birleşken Devletlerinde hasta sayısı artqanı içün ABDni vatandaşları sıñırsız seyaat ete bilgen memleketlerniñ «telükesiz cedvelinden» çıqarmağa tevsiye etti. Cedvelden İsrail, Kosovo, Lübnan, Montenegro ve Şimaliy Makedoniyanı da çıqarmağa tevsiye etildi.
Danimarka akimiyeti sentâbrniñ 10-nda bütün koronavirus sıñırlavları lâğu etile, dep ilân etti, dep haber etti memleketniñ sağlıq nazirligi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
