Avropa Birligi «Rusiye silâlı quvetleriniñ Ukraina şeerlerinde yapqan canavarlıqlarını qararlı bir şekilde takbih ete». Bu aqta aprelniñ 4-nde derc etilgen Avropa şurasınıñ beyanatında aytıla.
«Vatandaşlar arasında ölgen ve yaralanğanlarnıñ büyük sayısı, yaşayış infrastrukturasınıñ viran etilüvi Rusiyeniñ Ukrainağa ve halqına qarşı kerçekleştirgen agressiv deşetli cenkiniñ yüzüni köstere. Buça şeerinde ve Ukrainanıñ diger şeerlerinde kütleviy öldürüvler Avropa toprağında yapılğan canavarlıqlar cedveline kirsetilecek», – dep aytıla beyanatta.
Avropa Şurası, Rusiye akimiyeti bu öldürüvlerden mesüliyetli ola, çünki olar Rusiye quvetleri bu rayonlarnı kontrol etkende oldı, ve mında işğalnen bağlı halqara uquq maddeleri tarqala, dep qayd etti.
Cenk ya da diger cinayetlerde qabaatlı olğanlar, ükümet memurları ve arbiy yolbaşçılar «mesüliyetke çekilmeli», dep aytıla beyanatta.
Avropa Birligi Halqara cinaiy mahkeme prokurorı ve BM insan aqları yuqarı komissarı idaresiniñ tahqiqatk ömissiyası keçirgen cenk cinayetleri ve insanlıqqa qarşı cinayetler tahqiqatına qoltutqanını bildire. Avropa Birligi Ukraina Baş prokuraturasına «cenk cinayetleriniñ delillerini toplamağa ve saqlamağa» yardım ete.
«Dünya içün qorqunç olğan bu künlerde Ukraina ve Ukraina halqınen birdemlik kösteremiz. Avropa Birligi Ukrainağa qoltutmağa devam etecek ve Rusiyege qarşı ilerideki sanktsiyalarnen bağlı işni acele tezleştircek. Prezident Putin bu cenkni tez ve şartsız toqtatmalı», – dep bildire Avropa Birligi.
Rusiye Tahqiqat komitetiniñ yolbaşçısı Aleksandr Bastrıkin ise Buçadaki kütleviy öldürüvler haberleri sebebinden Ukraina Mudafaa nazirliginiñ areketlerini Rusiye ordusı aqqında «yalan haber» maddesine istinaden teşkermege emir berdi. Rusiye Federatsiyası Mudafaa nazirliginiñ versiyasına köre, Buçadan kelgen bütün haberler «doğru degil ve provokatsiya ola». Tahqiqat komitetiniñ malümatına köre, Ukraina müessisesi bu videolarnı «Rusiye arbiyleriniñ itibarını tüşürmek maqsadınen» tarqattı.
Aprelniñ 3-nde saba jurnalistler ve Ukraina akimiyeti Kyivniñ şimaliy-ğarbindeki Buça şeeriniñ soqaqlarında elâk olğan onlarnen insan aqqında bildirdi. Qolları bağlı ölgen vatandaşlarnıñ fotoresimlerini Reuters, UNİAN, AFP agentlikleri tarafından derc etildi. Ukraina ordusı şeerni azat etti, Rusiye ordusı çekildi.
Rusiye Mudafaa nazirligi Kyiv civarındaki Buçada öldürilgen barışıqsever insanlarnıñ fotoresim ve videolarını «daa bir provokatsiya» ve «Kyiv rejiminiñ ğarbiy kütleviy haber vastaları içün bir sanalaştırması» dep adlandırdı.
Ukraina Tış işler naziri Dmıtro Kuleba Halqara cinaiy mahkemesini Buçağa missiya yollamağa çağırdı. «Halqara cinaiy mahkemeni ve halqara teşkilâtlarnı Buçağa ve Kyiv vilâyetiniñ azat etilgen diger şeer ve köylerine missiya yollamağa çağıram, Ukraina uquq qoruyıcılarınen beraber rusiyelilerniñ cenk cinayetlerini isbatlaycaq bütün deliller daa tafsilâtlı toplanmalı», – dep qayd etti o.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
