Yanvarniñ 12-sinde Brüsselde başlaycaq Avropa şurasınıñ oturışında Rusiyege qarşı sanktsiyalarnıñ daa yarım yılğa uzatılacağı beklenile. Bunı, gizli avropa memurına atıf etip, Azatlıq Radiosınıñ mühbiri bildirdi.
Dekabr 12-13-ünde ötkerilecek Avropa şurası oturışınıñ kün tertibinde, Almaniya kantsleri Angela Merkel ve Frenkistan prezidenti Emmanuel Macron, dekabrniñ 9-ında Parisde keçirilgen "Normandiya dördü"niñ körüşüvinden soñ, Minsk añlaşmalarınıñ yerine ketirilmesi aqqında liderlerge malümat berecek.
Avropa Birligi cumaaqşamı künü, iyünniñ 27-nde, Rusiyege qarşı iqtisadiy sanktsiyalarnıñ 2020 senesi yanvarniñ 31-ne qadar uzatılğanını resmiy şekilde ilân etti.
Avropa Birliginiñ aza memleketleri liderleri iyünniñ 20-nde Ukrainağa qarşı istilâ sebebinden Rusiyege qarşı sektoral iqtisadiy sanktsiyalarnı daa yarım yılğa uzatmağa qarar aldı.
Sektoral iqtisadiy sanktsiyalar Rusiye bankları ve şirketleriniñ Avropa Birligindeki sermiyanıñ birinci ve ekinci bazarları ile bağlarını sıñırlamaqta, silâ satışında ihrac ve italni yasaqlamaqta, arbiy qullanuv ya da Rusiyede arbiy alıcılar içün ekili qullanuv mallarınıñ ihracını yasaqlamaqta, em de cermaynı qazıp çıqaruv ve qıdıruvda qullanıla bilgen tehnologiya ve hızmetlerde Rusiyeni sıñırlamaqta.
İlk sefer bu sanktsiyalar 2014 senesi iyülniñ 31-nde Rusiyeniñ Ukrainadaki vaziyetni kerginleştirüv areketlerine qarşı cevap olaraq kirsetilgen ve 2014 senesi sentâbr ayında quvetleştirilgen edi.
