Ukraina millet vekili, qırımtatar halqı lideri Mustafa Cemilev Qırım.Aqiqatqa bildirdi ki, diger parlament fraktsiyasına birleşmek maqsadınen onıñ «Avropa birdemligi» fraktsiyasından ve diger halq mebuslarınıñ, qırımtatarlarnıñ Yuqarı Radadaki fraktsiyalarından çıqma meselesi şimdilik baqılmay.
Mustafa Cemilevniñ Qırım.Aqiqatqa aytıp bergenine köre, bu sual diger mebuslar, qırımtatarlar da iştirak etken Ukraina prezidenti ofisiniñ başı Andriy Yermak ile körüşüvde ultimatum kibi degil, teklif kibi muzakere etilgen. Bu körüşüv daa keçken sene olğan.
«Bu muzakere kibi edi: farqlı fraktsiyalarda – «Ses», «Avropa birdemligi»nde olğan qırımtatarlar, belki başqaları da qoşulır, olar birleşip ayrı bir «Qırım» ya da «Qırımnıñ işğalden boşatıluvı» adlı bir parlament gruppasını teşkil etse ediler yahşı olmaz edimi, o zaman Qırım ile bağlı sualler Yuqarı Radada tezce al etilir edi», – dedi Cemilev Qırım.Aqiqatqa.
Evel jurnalist, ATR birinci qırımtatar telekanalı baş müdiriniñ muavini Ayder Mujdabayev Facebook saifesinde yazdı: «Mustafa Cemilev ATR telekanalınıñ yayında, Aydriy Yermak oña şart qoyğanını ayttı. Cemilev Poroşenkonıñ fırqasından çıqqanınen, qırımtatarlarnıñ meseleleri tezce al etilecek».
Prezident ofisiniñ başı Andriy Yermak şimdilik bunı açıq tefsir etmedi. Qırım.Aqiqat Ukraina prezidentiniñ ofisine resmiy malümat talabını azırlay.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
