Avropa şurasınıñ insan aqları komissarı Dunya Miyatoviç Rusiye ilhaq etken Qırımnı ziyaret etmege niyetlengenini, amma «bunı daa tasdıqlamaq kerek», dep bildirdi. Bu aqta Avropa Şurası insan aqları komissarı ofisiniñ matbuat hızmeti haber etti.
«Kütleviy haber vastaları ve İnternette Qırım ziyaretimnen bağlı tarqatılğan bazı malümatlar sebebinden Qırımğa kerçekten barmağa planlaştırğanımnı, amma bunı daa tasdıqlamaq kerek, dep qayd etmege isteyim. Yarımadada aq qorçalayıcı faaliyetinen oğraşa bilmem içün bir çoq mesele çezilmek kerek», – dep bildire Miyatoviçniñ aytqanlarını onıñ ofisi.
Rusiye Tış işler nazirliginiñ matbuat hızmeti bildirgenine köre, «AŞ insan aqları komissarı Miyatoviçniñ Qırım ziyaretiniñ bu sene oktâbrniñ 7-11-ne belgilenmesi aqqında añlaşma tizildi».
Qırım.Aqiqat Ukraina Tış işler nazirliginden izaat almağa tırıştı. Ukraina nazirligi Miyatoviçniñ Qırım ziyareti niyetlerinen bağlı açıq izaat daa bermedi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
