Ukraina arbiyleri bulunğan Avdiyıvka ve Opıtne civarlarında mermilerniñ patlağanı eşitile.
Bu aqta Azatlıq Radiosınıñ leyhası Donbas.Realii Radiosınıñ mühbiri adise yerinden bildire.
Onıñ aytqanına köre, ateş devam ete. O, büyük kalibrli snarâdlardan olğan sekiz patlavnı saydı.
Donetsk arbiy-vatandaş memuriyetiniñ yolbaşçısı Pavel Kirilenko haber etkenine köre, Donetsk vilâyetindeki bir sıra şeerniñ sakinleri suvsız qaldı, çünki Rusiye gibrid küçleri fevralniñ 19-nda çatışma yerindeki Cenübiy-Donbas suv borusınıñ tulumba stantsiyasına ateş açtı.
Soñki bir qaç kün devamında Ukraina Şarqındaki telükesizlik vaziyeti fenalaştı. Donbastaki gibrid küçler fevralniñ 17-nde saba açqan ateş neticesinide Stanıtsâ Luğanskadaki bala bağçasınıñ binası zarar kördi, müessiseniñ üç hadimi yaralandı, Kondraşovska-Nova lokomotiv deposı da zarar kördi.
«DNR» ve «LNR» başları kontrol etken topraqlarınıñ sakinleri fevralniñ 18-nde kündüz Rusiyege tahliye etilecek, dep ilân etti. Bunıñ sebebi olaraq regionda artqan kerginlikni aytalar.
Rusiye kütleviy haber vastalarınıñ malümatına köre, Donbastaki aydutlarnıñ yetekçileri umumiy seferberlikni ilân etti.
Ukraina akimiyeti Donbasta bir de bir ücüm tedbirlerini planlaştırmay, dep bildire.
