Ukrayına cenübi quvetleriniñ birleşken koordinatsion matbuat merkeziniñ yolbaşçısı Natalya Ğumenük işğal etilgen Qırımda yañı patlavlarnı ilân etti. Onıñ aytqanına köre, yarımadada yaşağan ve raatlanğan rusiyeliler ava telükesi signalı seslerine alışmalı.
«Plâjlarğa qadar ketmeycek, dep tüşünem. Çünki anda qum oynadılar. Oyunları mında biter», – dedi o, Qırım yarımadasınıñ ğarbindeki bazı plâjlarda okoplarnıñ peyda olğanını izaatlap.
Ğumenükniñ aytqanına köre, Qırımda şimdiki sezon «tek kurort degil, «pamuq» (ukrayın tilinde pamuq sözü patlav sözüniñ manasını da taşıy) mevsimi» dep ilân etildi.
«Şunıñ içün ava telükesi signalına alışsınlar», – dedi o.
Aprelniñ 24-ne keçer gecesi Qırım.Aqiqat mühbirleri Aqyardaki patlavlar aqqında haber etti. Olarnıñ aytqanına köre, patlavlar Nahimov oquv yurtu ve Streletskaya körfezi yaqınlarındaki arbiy bölükler rayonında eşitildi. Zenit topu ve atıcı silâ ateşleri de eşitildi.
Malümatnı şeerniñ Rusiye yolbaşçısı Mihail Razvojayev tasdıqladı. Onıñ aytqanına köre, gece Aqyarğa suv üstü dronlar ücüm etti – bir uçucısız yoq etildi, ekincisi özü patladı.
ABD ordusınıñ sabıq Avropa komandanı general Ben Hocesniñ fikirince, Ukrayına ordusınıñ qarşı ücüm maqsadı Qırım izolâtsiyası olmalı. O, Rusiye Qırımda qalsa, Ukrayına özüni telükesizlikte is eter, iqtisadiyatını ğayrıdan tikler, dep tasavvur etip olamay.
Hocesniñ aytqanına köre, Rusiye Federatsiyası Qırımnı «qolunda tutsa», ileride Azaq deñizini blok etecek ve Qara deñizde ticaretke keder etecek.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
