Ukrainanıñ tele ve radio yayınları milliy şurasınıñ azası Sergey Kostinskiyniñ fikirince, esapları blok etilgeni sebebinden qapanuv telükesi altında qalğan ATR qırımtatar telekanalınıñ vaziyeti işğal etilgen Qırım sakinlerini Ukraina televizion yayınlarından marum etecek. Konstinskiyniñ fikirince, Ukraina yarımadadaki informatsion cenkte yutturacaq.
«Ukrainanıñ büyük şahsiy telekanallarınıñ uydu signalı kodlaşqanı sebebinden Qırım içün yayın yapqanlar vaqtınca işğal etilgen yarımada sakinlerini ukrain yayınlarını temin etken yekâne tesirli media ola», – dep izaatladı Köstinskiy ATR vaziyetini Facebookta.
Onıñ qayd etkenine köre, qırımtatar mediası – «qırımtatarlarnıñ medeniy hazinesi, milliy til ve medeniyetni saqlav aletlerinden biridir».
«Ükümetniñ areketleri ya da areketsizligi neticesinde qırımtatar medialarınıñ qapatıluvı – Ukraina devletiniñ Qırımnı azat etüv, milliy medeniyetni saqlav ve qırımtatar halqınıñ azat etilüvi ve saqlap qaluvı meselelerinde beceriksiz ve lâqayt olğanınıñ timsalidir», – dep tüşüne Kostinskiy.
Onıñ fikirince, ATR kibi telekanallar olmasa, Ukrainağa yarımadada Rusiye propagandasınen informatsion cenkte daa zor olacaq.
«İnformatsion cenkte bir yutturuv. Ukrainağa ait qırımtatar medialarınıñ ğayıp oluvı devletniñ Qırımdan ve qırımtatarlardan vazgeçkenini köstere», – dep yazdı Kostinskiy.
Bazarertesi künü, fevralniñ 10-nda, ATR qırımtatar telekanalı esapları blok etildi, dep bildirdi.
Şu sebepten telekanal alıp barıcı ve musafirler olmağan yayınlarnen #SaveATR marafonını başlattı.
Daa evel sermiyası yetmegeni içün ATR telekanalı para toplap başladı.
ATR Ukrainadan sürgün etilgen qırımtatarlar ve diger millet insanlarını yerleştirüv bücet programmasına köre 2016 senesinden berli devlet bücetinden maddiy yardım ala.
2015 senesi aprelniñ 1-nde ATR Rusiye litsenziyasını alamayıp, işğal etilgen Qırımda yayınlarını toqtattı. Yayınlar 2015 senesi iyünniñ 17-nde yañıdan başladı – telekanal Kyivge köçti.
