Qırımdan Rusiye üzerinden Astanağa kelgen yüzlernen insan Qazahistandaki Ukrayına elçihanesi ögünde toplaştı. Çoqusı yolğa devam etmek içün çetel pasportını yaptırmağa planlaştıra, dep haber ete Radio Azattık.
Radio Azattık ile laf etken qırımlılar (çoqusı qırımtatarı) Rusiye işğal etken Qırımda da yapılğan seferberlik sebebinden cenkleşmemek ve öldürilmemek içün ketmege mecbur edi, dep ayttı.
«Çoqusı cenkleşmege istemey. Biz, musulmanlar, daima barışıq isteymiz. Birini öldürseñ, barışıq aqqında nasıl aytarsıñ? Anda (Ukrayınada – QA) barışıqsever insanlar öldürile, vatandaş infrastrukturası yoq etile. Musulmanlar bunı yapacaqmı? Bir çoqumız bunı red etti. Amma Qırımda ve Rusiyede olğan insanlarnıñ saylav aqqı yoq. Seferberlikten bir qaç kün ögüne qanun (Rusiye Federatsiyasınıñ ceza kodeksine «seferberlik», «cenk vaziyeti» ve «cenk vaqtı» kibi sözlerni kirsetken qanun leyhası – QA) qabul etildi, onıñ esasında seferber olmağa istemegenlerni apis cezası bekley. Amma bu da zulum. O, er yerde (Rusiyede – QA) ve Qırımda bar», – dep ayttı adını aydınlatmamağa rica etken er kişi.
O, Qazahistandan Özbekistanğa ketecek ola, çünki anda qardaşı yaşay ve iş teklif etti, dep ayta.
«Tuvğanlarımnı körmege isteyim, qardaşımnı. Belli olmağan vaqıtqa olarğa baracam. Qorantam Qırımda qaldı. Olar içün pek qasevetlenem, pek sevem. Qazahistannı birinci künden begendim», – dep qoştı er adamı.
Qırımdan kelgen daa bir er adamı, uzaq mesafelerge barğan avtobus aydavcısı, adını aytmamağa rica etip, Qırımda ana-babası qaldı, dep bildirdi. Onıñ aytqanına köre, bugün bir çoq memleketniñ elçihaneleri, şu cümleden Avropa, olarnı qabul etmedi.
«Ukrayına red etse, çirkin olur. Balalarımıznen keldik. Vatanımıznıñ qapusı ögündemiz. Rusiyeni vatan dep saymaymız, o, dünyağa zarar ketirgen ve zarar ketirmege devam etken işğalciler memleketidir. Er şeyni yahşı yapsa edi, belki, ketmez edik. Biz çoqmız. Avropağa, Türkiyege ketmege istegenler çoq. Apayımnen Avropağa ketmege isteymiz, çünki Ukrayına tasilimiz bar, Rusiyede bu bilgilernen çalışıp olamaymız. İlerilemek içün bizge yardım kerek», – dedi o.
O, iş yerinde er kesten arbiy bilet talap etilgen soñ, Qırımdan ketmege qarar aldı, dep tarif etti.
Ukrayınanıñ Qazahistan konsulı İvan Almaşi Radio Azattıkqa izaat berip, Ukrayına elçihanesi «insanlarnıñ elindeki vesiqalarına baqmadan, er keske elinden kelgeni qadar yardım etmege tırışacaq», dep ayttı. Bazılarınıñ Rusiye pasportları da bar.
«Olar Ukrayına pasportlarını kösterse, Ukrayına vatandaşlığından vazgeçmegen olsa, olar Ukrayına vatandaşları ola. Beklegen çoq insan bar. Olarnıñ vesiqaları olsun dep çalışam. Mında añlap areket etmeliler. Er şeyni teşkerip, imkânımız olğanı qadar resmiyleştirmelimiz: birine – çetel pasportını, birine – qaytuv şeadetnamesini. Er şey ellerindeki vesiqalarğa bağlı», – dedi İvan Almaşi.
Onıñ aytqanına köre, kelgen insanlar çetel pasportını almaq içün sıra bekley.
Sentâbrniñ 21-nde Rusiye prezidenti Vladimir Putin Ukrayınağa qarşı cenkni devam ettirmek içün «qısmiy seferberlik» ilân etti. Putinniñ aytqanına köre, yedekte olğan vatandaşlar arbiy hızmetke alınacaq. Mudafaa naziri Sergey Şoygu «qısmiy seferberlik vaqtında yedekte olğan 300 biñ kişi askerlikke alınacaq», dep bildirdi. Bir sıra menba Rusiye akimiyeti millionğa yaqın vatandaşnı seferber etmege planlaştıra, dep bildire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
