Aslında Qırımdaki bütün mekteplerde rusiyeliler balalarnı arbiyleştire. Talebelerni Rusiye arbiyleri içün maskalama ağlarını yapma, cebege mektüpler yazma ve RF ordusı içün resurs toplama işlerinen ögraşmağa zorlaylar. Bunı FREEDOM telekanalınıñ yayınında Qırımtatar Milliy Meclis reisi Refat Çubarov bildirdi.
"Arada-sırada ana-babalarnıñ diqqatını buña celp etemiz, çünki bazı allarda olar buña qarşılıq köstere bileler. Keçken afta Aqmescit rayonındaki ukrayin orta mektebinde sözde göñüllilerniñ ve çeşit arbiyleştirligen tedbirlerniñ teşkilâtçılarınıñ kütleviy toplanmasına diqqat ettik. Aynı zamanda balalarnıñ bütün bu adiselerge celp etilmesi videoğa çekile ve Rusiye telekanallarında kösterile", - dep bildirdi o.
Aynı zamanda Çubarovnıñ qayd etkenine köre, rusiyeliler balalarnıñ añınıñ mefküreviy qandıruvına devam ete.
"Balalarnıñ, hususan da oğlanlarnıñ 18 yaşını toldurğanda cinayet etmesine azırlıq kete. Bunıñ içün ana-babalarnı buña qarşılıq köstermege çağıramız ve balalarnı bu cinayetlerge celp etkenlerniñ cedvelini de tizmege tırışamız", - dep qoştı Çubarov.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
