Oktâbr ayında «Qırım aq qorçalayıcı gruppası» Rusiye Silâlı quvetlerinde askerlik yapmağa razı olmağan Qırım sakinlerine qarşı 4 yañı cinaiy dava açılğanını qayd etti.
«Bundan ğayrı, Rusiye Ceza kodeksiniñ 328-inci maddesine köre çıqarılğan 10 yañı üküm qayd etildi. Oktâbrniñ soñuna qadar Qırım aq qorçalayıcı gruppası işğal devamında Rusiye Federatsiyasınıñ Silâlı quvetlerinde askerlik yapmağanlarğa qarşı açılğan ve Qırım «mahkemelerine» berilgen 271 cinaiy davanı qayd etti. 259-ınıñ ükmü çıqarıldı, daa 12-si baqıla», – dep bildire aq qorçalayıcılar.
Qırım aq qorçalayıcı gruppasınıñ malümatına köre, avgust ayında Rusiye kontrolindeki Qırım mahkemeleri Rusiye silâlı quvetlerinde «askerlik yapmaqtan vazgeçken» qırımlılarğa qarşı 10 üküm çıqardı, bir ay içinde 14 yañı cinaiy dava açıldı.
Oktâbrniñ soñunda Ukraina uquq qoruyıcıları Qırımnıñ Qarasuvbazar rayonınıñ Rusiye arbiy komissarına şübheli olğanını bildirdi. Qırımnıñ arbiy komissarı sekiz yıldan on eki yılğa qadar apiske alına bile.
Qırım Muhtar Cumhuriyeti ve Aqyar Prokuraturası yarımadada Rusiye ordusına çağıruv kampaniyasını keçirgen 10 qırımlı arbiy komissarğa şübheli olğanını bildirdi.
Qırım Muhtar Cumhuriyeti ve Aqyar Prokuraturası bildirgenine köre, 2015 senesinden berli Qırımda Rusiye akimiyeti 13 askerlikke çağıruv kampaniyasını keçirip, 34 biñden çoq qırımlını Rusiye Silâlı quvetlerine askerlikke yolladı.
2021 senesi fevral ayında Avropa parlamenti Rusiye tarafından işğal etilgen Qırımda insan aqlarınıñ bozuluvını, şu cümleden – «qırımlılarnı Rusiye ordusına mecburiy çağıruvnı» takbih etken qararğa rey berdi.
Qırımlılar ve aqyarlılarnıñ Rusiye ordusına çağırıluvı
Qırım işğalinden soñ Rusiye yarımada sakinlerini öz silâlı quvetlerine askerlikke ala. Ukraina Tış işler nazirliginiñ malümatına köre, soñki altı yılda tahminen 25 biñ qırımlı ve aqyarlı Rusiye ordusına yollanıldı.
Human Rights Watch halqara aq qorçalayıcı teşkilâtı, 2019 senesi baarde arbiy hızmetke çağırılğan qırımlılarnıñ tahminen 85%-ı qomşu Rusiyedeki bazalarğa yollanıldı, dep bildirdi.
BM, Rusiye Qırım sakinlerini öz silâlı quvetlerine çağırmamalı, dep çoq israr etken edi. Teşkilât, Moskvanı halqara uquqqa riayet etmesine çağıra.
Rusiye Ukraina ve halqara teşkilâtlarnıñ beyanatlarına qulaq asmayıp, yarımadada askerlik kampaniyasını devam ettire. Em de askerlik yapmağa istemegen Qırım sakinlerini taqip ete. «Qırım aq qorçalayıcı gruppasınıñ» malümatına köre, 2020 senesi iyül ayına qadar Rusiye Silâlı quvetlerinde askerlik yapmaqtan vazgeçkenlerge qarşı 125 cinaiy dava açıldı, olar Qırım mahkemelerine berildi. 113-üniñ ükümleri çıqarıldı, daa 12-si baqılmaqta.
Qırım Muhtar Cumhuriyeti ve Aqyar şeeriniñ prokurorı İgor Ponoçovnıy, Rusiye ordusına çağırılğan Qırım sakinleri esas Ukrainada cinaiy taqipke oğratılmaycaq, dep haber etti. Müessise, Rusiye ordusında askerlik yapacağına dair celpname alğan qırımlılardan telefon ya da elektron poçta vastasınen muracaat etmelerini rica ete.
Moskva yarımadada askerlikke çağıruv qanunğa uyğun ola, dep israr ete. Rusiye Tış işler nazirliginiñ spikeri Mariya Zaharova Moskvanıñ «öz toprağında talim keçirmek, er angi obyekt yerleştirmek, askerlikke çağırmaq ve gençlerge vatanperver terbiyesini bermek aqqı bar», dep bildirdi.
